1232/2023-2024

Aizawl, the 22^nd July 2023: Tlai dar 6:00 khan Home Commissioner Pu H. Lalengmawia, IAS chuan a Office Chamber, MINECO-ah Mizo Students’ Union (MSU)-in Mizorama Meitei chungchanga hriat duh an neihte sawipuiin meeting a neihpui.

Meeting hi Commissioner & Secretary, Home Department chuan kaihruaiin Sawrkarin Manipur tualchhung buaina chungchanga hma a lak dan leh kan unau raltlante a chhawmdawl mek dante sawiin khawtlang leh NGO ten hemi kawnga Sawrkar an thawhpui dan leh ke an pen chhuah dan chu ropui leh lawmawm a tih thu a sawi. Meeting-ah hian MSU hruaitute chuan Mizorama Meitei awm mek te chungchanga hriat duh an neih te hre tura hmalak an tum hi Mizorama Meitei awm mekte hnawhchhuah leh tihthlabar tumna ni lovin an him zawk nana tih a nih thu an sawi a. Ngun taka sawi ho a nih hnuah a hnuai ami ang hian thu rel a ni.

MSU-in Mizoram chhunga Meitei awm te chungchanga hriat duh an neih hre tura thil tih an tumah Mizoram Sawrkarin an thil hriat duhte chu a hrilh theih dawn avang leh Sawrkar hotuten an thil tum chu kal tlangpui lo tura an ngen avangin an thil tum hi bawhzui zel loh an remti a. Chuvangin hemi chungchangah thil thar a awm anih chuan inpawh tlang takin sawi ho zel rem an ti.