1233/2023-2024

Kolasib dated 24th July 2023: Vawiin chawhma khan Kolasib Deputy Commissioner pisa tualzawl atangin Pu John LT Sanga, District Election Officer leh Deputy Commissioner ni bawk chuan MLA inthlanpui neih tur a inpuahchahna pakhat, Electronic Voting Machine hman dan inzirtirna atan, mipui a duh apiang tan a hman theih turin ‘EVM Demonstration Van’ a vailiam. He hun ah hian Election Office leh DC office-a thawktute an tel a ni.

Pu John LT Sanga, DEO chuan inthlanna felfai awm tur chuan inthlan dan kalhmang leh inthlanna hmanrua hman dan hriatchian a pawimawh thu sawiin Vote thlakna hmanrua EVM hmelhriat a, a hman dan thiam tur a mipui tan a tih chhin theih tur a chhawpchhuah chu thil pawimawh tak a nih thu a sawi a. Kolasib District mipuite tan EVM an hmelhriat theih nan leh an duh anga an belhchian a an hman chhin theihna turin Election Office, Kolasib kaltlangin ‘EVM Demostration Van’ chu buatsaih a nih thu a sawi a ni.

‘EVM Demonstration Van’ hi Kolasib district chhung Assembly Constituency pathum a Polling Station 89-te tlawh chhuak tur a ruahman a nih bak ah khaw chhung leh pawn hmun laili lai ah mipui EVM belchiang leh hmang chhin duh apiang tan hun siam sak tum a ni a. Vawiin atanga tlan chhuak tannin Kolasib khaw chhung an tuam hmasa dawn a ni. Deputy Commissioner pisa chhung ah hian ‘EVM Demonstration Booth’ chhawpchhuah a ni bawk a, hetah hian EVM hman dan inhrilhhriatna leh tih chhin theih a ni bawk.