1234/2023-2024

Aizawl, 24th July, 2023 : Deputy Chief Minister Pu Tawnluia’n Chanmari, Aizawl-ah “Ramlai Road” cheng nuai 30 senga siam chu tukin khan a hawng.

Deputy Chief Minister in Ramlai Road a hawn hnu hian hemi puala inkhawm Pu C. Lalmuanpuia, bialtu MLA ni bawk chenna in, Chanmari West ah neih a ni a. He hunah hian khuallian Pu Tawnluia chuan Ramlai Road chu a bult anna kan hawng a, a tihchangtlun zelna tur pawh kan ngaihtuah dawn a, Chaltlang Dingdi veng thleng a tlang chhoh theih nan kawng kan zawng zel ang a ti. Deputy Chief Minister chuan mipuite chhawr tangkai tur leh hmasawnna tur hi kan ngaih pawimawh ber a ni reng a, thil tha hi chu inngaihhlutpui thin a pawimawh a, mipuite pawhin mahni ta a ni tih hria a dimdawi leh uluk taka hmang tangkai turin a chah a, Chanmari leh Chanmari West khawtlang mipuite chungah a bik takin PHE tui pipe lian an phum chungchanga an dawhtheihna leh hriatthiamna, an inphalna avangin lawmthu a sawi bawk a ni.

Khualzahawm Pu C. Lalmuanpuia pawhin a bial chhung mamawh chi nhrang hrang an thlen thinah Deputy Chief minister in a lo ngaih pawimawh sak thin avanga lawmthu sawiin, Ramlai Road chu an tan chuan hmasawnna lawmawm tak a ni, a ti a. Lirthei ke pali nei a luh theih loh avangin damlo serious damdawiina kalpui ngaite pawh hlangin an zawn thin a, gas leh thil dang ilo sem chungchangah pawh harsatna an tawk thin a, tunah chuan heng harsatnate hi sutkin a lo ni dawn ta a ni a ti a. Ram lei phalsaktu Pu H.Sangate chhungkaw chungah leh Chanmari & Chanmari West local council hotute chungah lawmthu a sawi bawk a ni.

Ramlai Road hi tunhma chuan two-wheeler chiah a tlan thei a, kawng thar siamna atan hian Pu H. Sanga, Chanmari ram chu cheng nuai 120 a lei niin kawng hi lirthei ke li tlan theiin tih zau a ni ta a ni. UD&PA department hnuaiah hna thawh niin a project hming hi “Improvement of Ramlai Road at Chanmari, Aizawl” tih niin, a khawihtu contractor hi Pu V. Biaknghinglova a ni. Ramlai road hi Chanmari leh Chanmari West inrinaah awmin chhungkaw 90 velin an chhawr tangkai thei dawn a ni.

Ramlai Road hawnna inkhawm hi Pu Lalbiakkima, Chairman, Ramlai Welfare Association-in a kaihruai a, Pu C. Malsawma, Executive Engineer, UD&PA Department hnen atang technical report ngaihthlak a ni a, Chanmari (Ward V) bialtu Corporator Pu Rosiamngheta leh Chanmari West (Ward VI) bialtu PuHon Zosangliana ten thu an sawi bawk a ni.