1235/2023-2024

Hnahthial the 24th July 2023: Hnahthial District Election Office chuan kumina Mizoram Legislative Assembly inthlanpui lo awm tur inpuahchahna kal zelah July ni 22 khan 29-South Tuipui Assembly Constituency huamchhunga khaw thenkhat Polling Station-te endikin Electronic Voting Machine (EVM) hman dan inzirtirna an nei.

He hunah hian 29-South Tuipui Assembly Constituency huamchhunga khaw thenkhat Tarpho, Khawhri, Cherhlun, Ngharchhip, New Ngharchhip, Thingsai leh Bualpui H a Polling Station te endikin mipui vantlang ten harsatna awm lova vote an thlak theih nan pawimawh leh tul te an enho a, harsatna awm thei turte leh a sutkian dan turte an ngaihtuah nghal bawk. Heng bakah hian inthlanna felfai tak a awm theih nan leh mipuiten inthlanna hmanrua an hriatchian lehzual nan Electronic Voting Machine (EVM) hmanga vote thlak dan mipuite hmaah enchhinna buatsaih a ni a, khawtlangin awlsam tak leh buaina tawk lova vote an thlak theih nan a duh apiangten thlak chhinin hun hlawkthlak tak hman ho a ni.

He hunah hian Election Officer Pu Lalbiakfela bakah Sub-Deputy Commissioner Pi Betty Lalrinfeli, Superintendent Pu KC Lalhriatpuia leh election branch officials te an tel a ni.