1822/2023-2024

LUNGLEI; the 11th September,2023: Vawiin chawhma dar 11:00Am khan Lunglei Convention Centre-ah 32- Lunglei West A/C Town Area chhunga Family Oriented SEDP 2nd Phase Beneficiary te tana buatsaih Sensitization & Briefing Programme-ah bialtu MLA leh Hon'ble Minister for Agriculturei,I&WC, Cooperation ni bawk Pu C. Lalrinsanga chuan khuallian niin a hman pui a, programme hi Pu Donny Lalruatsanga, Addl.DC in a kaihruai a ni.

Vawiin programme-ah hian Khuallian Pu Lalrinsanga chuan thu sawiin, Covid 19 hrileng avangin Mizoram chauh nilo, India sorkar laipui leh khawvel sorkar lian zawk te pawhin harsatna namen lo an tawk a, chu harsatna atanga talchhuah tum chuan theitawp chhuahin an la bei fat fat reng a ni.Chutiang harsatna karah chuan Mizoram sorkar pawhin a flagship programme SEDP tih hlawhtlin nan theitawp chhuahin hma a la tang tang a. Tunah hian 1st Phase-ah 1st leh 2nd Installment a sem chhuak tawh a, vawiinah hian 2nd Phase-a 1st Installment semchhuak leh theih dawn ta a ni.3rd Phase te pawh kalpui leh thuai turin ruahhmanna siam mek a ni a.1st Phase-a 3rd Installment te, 2nd Phase-a 2nd Installment te pawh a tahtawlin kan la sem zel dawn a ni.Line Dept thenkhat hnuaia trade thenkhatah phei chuan cheng nuai 3 kan release tawh te pawh a awm a ni. Flagship programme SEDP hnuaiah hian vawikhatah cheng nuai 3 hi inpek theih a ni lova, a tahtawla nuai 3 hi semchhuak turin ruahmanna siam a ni, a ti.

Khuallian chuan hetianga Sensitization leh Briefing programme kan buatsaihna chhan chu beneficiary te Bank Account a sorkarin pawisa a dahluh ringawt chuan beneficiary ten SEPD tanpuina an dawn hi an duh duhnaa an hman palh mai a hlauawm a. A hmanna tur dik taka beneficiary ten an lo hmana, eizawnna ngialnghet leh an khawsak dinhmun tihthat zawk nana an hman ngei theih nan mulmal taka infuihna hun atana buatsaih a ni thu a sawi. Mi rinawm, mi dik leh taima te chu an thiltihah an hmuingilin malsawmna pawh an dawng thin a. Chuvangin SEDP 2nd Phase-a tanpuina dawngtu te pawhin rinawm tak leh taimak taka an tanpuina dawn chu hmang tangkai a,dinchhuahpui nana hmang theuh turin a fuih hlawm a ni.Vawiina 32-Lunglei West A/C Town Area chhung atanga 2nd Phase -a SEDP tanpuina dawngtu tur 1087 beneficiary te hian APR-ah an signature an pek vek hnuah, an Bank Account-ah Rs.25000 theuh dahluh sak an ni ang.APR a signature an pek lai hian an voter ID leh Bank account te fimkhur taka endik thlap a ni ang. Naktuk leh Naktipah hian Lungdai,Serte,Sertlangpui,Kawlhawk, Buarpui leh W.Bungtlang khuaa Beneficiary te tan Sensitization & Briefing programme hi hman leh a ni ang a, hemi hunah hian Beneficiary ten APR-ah signature an pe leh hlawm dawn a ni.32-Lunglei West A/C hnuaiah hian a hnuai ami ang hian Beneficiary an awm mek a ni.

1) AH&Vety Dept.---1063
2) Commerce &Industries Dept.--267
3) Agriculture Dept.---17
4) Fishery Dept.--114
5) Horticulture Dept.---64

Minister Pu C. Lalrinsanga hian Convention Centre-a programme  a hman zawh hian  Sertlangpui panin Lunglei a chhuahsan nghal a ni.