1821/2023-2024

Champhai the 11th September, 2023 – Transport Minister leh Champhai South bialtu MLA Pu TJ Lalnuntluanga chuan vawiin chawhma khan Champhai khawpui chhunga hmasawnna hnathawh hrang hrang kal mekte leh hmalak tul te a hmunah kalin a enfiah a ni.

Minister hi Champhai DRDO Project Director Pu Lalrinawma leh official dangte bakah khawtlang hruaitute, tlawmngai pawl aiawhte leh party hruaituten an tawiawm a ni.

Minister leh amah zuitute hian Mangkhaia Hall, Zotlang an tlawh hmasa a. He hall hi Rural Development Department sum kaltlanga thuam that tur niin Champhai DRDO Project Director Pu Lalrinawma leh DRDO thawktu dangte leh Zotlang khawtlang hruaitute nen a repair hna thawh dan tur ruahmanna an siam ho a ni.

SASCI Phase I kaltlanga Champhai Venglaia hmalakna liantham kal mek pahnih - cheng nuai 90 senga ruahman mek Venglai Community Multipurpose Convention Centre leh cheng nuai 20 senga ruahman mek Venglai Basketball Court-te an tlawh bawk a. Community Multipurpose Convention Centre Champhai Venglai hian Health Sub-Centre, Bazar leh Garage-te a keng tel dawn a. Venglai Basketball Court ho Venglai thlanmual ram chhungah ruahman niin a laih hna kalpui mek a ni. Heng ruhrel ruahman mek hna hi tha taka thawh chhoh zel anih theihnan Department hotute leh khawtlang hruaitute theihtawp lo chhuah tlang tura chahin Minister chuan harsatna an neihte pawh inthlahrung lova a hnena thlen vat thin turin a chah a ni.

Vawiin vek khan Transport Minister hian a chenna in, Kahrawt Champhai ah PWD hotute meeting neih puiin Champhai leh a chhehvel kawngpui dinhmunte, hnathawh kal mek te leh kawng repair ngai zual te chipchiar takin an sawi ho a. Meeting-ah hian PWD Champhai Division EE Er B. Vanlalhruaii, leh SDO Er Hmingthanmawia leh PWD thawktu dangte an tel a. Minister chuan kawng repair hnathawh piah lamah kan kawngte an tlo zawk theihnan PWD thawktute chu khawtlang hruaitute nen inrawn tlangin ngaihtuahna senga, ruahmanna thar ngaihtuah turin a ngen a. Champhai South Assembly Constituency huamchhunga kawng siam that nan SASCI 2023-24 sum cheng vaibelchhe 2.85 dah fel tawh anih thu PWD hotute chuan an report a. He Project hnuaia hna 21 awm te chu uluk taka zirchian ho niin hna tlo leh tha tak hun tiam chhunga zo hman ngei tura tan la zel turin Minister chuan a chah a ni.