November ni 28, 2018-a Mizoram State Legislative Assembly Inthlanpui buatsaiha hmun dang ruala vote thlak zawh hman lohna, Lawngtlai District chhunga 36-Tuichawng (ST) Assembly Constituency hnuaia 36/35-Ajasora polling station-a tha thara inthlan buaipui turin vawiin chawhma dar 10:30 khan polling party-te chuan Lawngtlai an chhuahsan.

Lawngtlai District Election Officer Pu N. Chakhai MCS, 36-Tuichawng constituency RO Pu R. Lalremsanga MCS leh official dangte'n DEO office kawt aṭangin polling party kal chhuakte hi an vai liam a. Polling party-te hian vawiinah Ajasora thlengin, a hmuna chin fel ngai thilte an buaipui zui nghal char char dawn a ni.

Tun inthlanpui neih zawh takah khan Ajasora polling station-ah hian vote thlakna khawl a chiankuan loh avangin mipuiin vote an thlak kim hman lo va. Hei vang hian Election Commission of India chuan he polling station bikah hian tha thara inthlan buatsaih turin a ti a. Lawngtlai District Election Officer kaihhruaina hnuaiah thil ṭul pawimawhte bawhzui nghal niin, inpuahchahna ṭha tak nen inthlan felfai, muanawm leh tluang tak buatsaih turin hma lak nghal a ni a. Hemi atan hian inpeih fel thawkhat tawhin, December ni 4, 2018 (thawhlehni) zing dar 7 atanga tlai dar 4 inkarah vote hi thlak a ni ang.

Heti anga inthlan buatsaih ṭhat a ngaih tak avang hian Ajasora polling station chu venhimna uluk ngai zual (critical) polling station-ah puan nghal a ni a. Venhimna lam pawh uluk taka ruahman nghal a ni.

Ajasora hi Lawngtlai aṭanga kilometre 150-a hla niin, he polling station hian Ajasora-I, Ajasora-II leh Ajasora-III te a huam a. Vote nei mipa 543 leh hmeichhia 537, an vaiin mi 1080 an awm.