State Election Commission team te hian vawiin hian EVM Strong Room leh vote chhiarna tur hmun a ruat leh Counting Centre te an tlawh kuala, henga an tlawh kualna hmunah te hian District Election Officer, SP, Addl SP leh Champhai District chhunga Assembly Constituency panga atanga Returning Officer leh Assistant Retuning Officer leh Election Officer, Champhai ten an tawiawm zel a ni.
Ruahman dan chuan 22-Tuichang Assembly Constituency vote tlate chu District Panchayat Resource Centre Auditorium-a chhiar tur a ni a, 25-East Tuipui Assembly Constituency a vote tlate District Panchayat Resource Centre Conference Hall-ah chhiar ani ang.
State Election Offcial te thurawn angin leh remchan zawkna vanging 21-Lengteng A/C, 23-Champhai North A/C leh 24-Champhai South A/C a vote tlate DC Badminton Hall-a chhiar tura ruahmanna awm sa chu thlak a ni a. 21-Lengteng A/C a vote tlate chu Observer's Room, DC Office-ah chhiar a ni ang a, 23-Champhai North A/C a vote tla chu General Establishment, DC Office-ah chhiar a ni ang a, 24-Champhai South A/C a vote tlate chu District Emergency Operating Centre (DEOC), DC office-ah chhiar a ni ve thung dawn a ni.
Tin, ECI duhdanin inthlan vote chhiar chhungin DC Complex-ah venhimna khauh tak siam tum a ni a. Mipui nawlpui paltlang theih loh turin District Panchayat Resource Centre peng-ah leh DC Pisa bulahte check-gate siam ani dawn a, heng gateah te hian luhphalna Identity Card neilo tan chuan a luh tlang theh dawn loh a. Venhim hna hi thuah thum a kaipui tum niin, Central Armed Police Force leh State Armed Police Forces ten venhim hna an thawk dawn a ni.
Ruahman dan chuan kar leh December Ni 6, 2018 hian vote chhiar tura ruatte pualin training buatsaih ani ang a, December Ni 7 hian Vote tla chhiar chhinna Mock Counting-te pawh neih ani ang. Vote tlak tawhna EVM dahna Strong Room-te hi venhimna tha tak hnuaiah chhun zan zawma venhim reng a ni.
State Election Official vawiin lama lokalte chu Pu Krishna Mohan Uppu, IAS, Addl CEO-II; Pi Mamu Hage,IAS, Assistant Commissioner,DC Office Aizawl; Pu H.Lianzela, Deputy CEO-I leh Pu Malsawmzuala, Assistant CEO te an ni.
