3026/2022-2023
Dated Serchhip, the 13th December, 2022: Vawiin khan Er. Lalrinawma, Deputy Speaker chuan 39th Mizoram Secondary School Games, 2022 chu Serchhip Sports Stadium ah a hawng.

A hawnna inkhawmah hian Er. Lalrinawma chuan, 39th Mizoram Secondary Games, 2022 hawnnaa khualliana an sawm avangin lawmthu a sawi a. Tunlaiah infiamna huang hrang hrangte chu eizawnna a tling deuh vek tawh a, hetiang lama theihna nei leh tuina neite tan kawng zau takin a inhawng a ni. Infiamna lama theihna neite zawn chhuahna buatsaih thiam pawh a pawimawh hle a, vawiinah chutiang hun tha buatsaih a ni hi hlu hle a ni. Tin, infiamna hian taksa leh rilru hriselna a ken tel avangin kan taksa uluk leh duat taka enkawl a tulzia zirchhuak telin, kan hriselna i ngaipawimawh deuh deuh ang u, kan thalaite in hrisel chuan he ram hi a hrisel tihna a ni. Vawiina zirlai naupangte hi he ram chunga mawhphurhna pawimawh tak chelhtute in ni a, a chhiat a that thuah in kutah a innghat thui em em a ni. Chuvang chuan he ram hian hmasawnna duhawm tak a neih zel theih nana enkawltu ni tura rilru leh taksa vawng tha zel turin ka sawm che u a, nitin inbuatsaih ang che u, tiin zirlai naupangte a chah a ni. Khuallian hian rilru thianghlim tak pu chunga inelna hrang hrangte hmachhawn tura ngen chungin Games hi a hawng a ni.

He hunah hian Pu Lalthanzama, Addl. Director of School Education pawhin thusawina hun a hmang a ni.

39th Mizoram Secondary School Games ah hian Aizawl District North leh South a thendarhte bakah District dang sawm, an vaia district sawmpahnihte aiawhin Secondary School te an tel a, Athletics Items hrang hrang panga bakah, Badminton, Table Tennis, Volleyball leh Football inelna hmanga intihsiakna neih tur a ni. Naupang 630 zet leh an hruaitu zirtirtu 66, an vaiin mi 696 an kalkhawm a, vawiin dar 12 atang khan inelnate hi neihzui nghal a ni ang. Athletics leh Football hi Serchhip Sports Stadium ah kalpui tur niin Badminton leh Table Tennis te hi Serchhip Indoor Stadium ah khelh a ni ang a, Volleyball hi Vengchhung Volleyball Court ah khelh a ni ang.

Zirtawpni khian a kharna hun hman tura ruahmanna siam a ni.