Mizoram Sports & Youth Services Dept leh Mizoram Sepak Takraw Association tangkawpa buatsaih ‘3rd Federation Cup Sepak Takraw Championship’ chu vawiin dar 11:00 AM khan Mizoram Governor Lt.Gen.(Rtd) M.M. Lakhera-in Govt Mizo HSS Auditorium, MacDonald Hill-ah a hawng a. He infiamna ‘Malyasian kickball / Indonesian volleyball’ tia hriatlar Sepak Takraw inelna hi a tum khatna atan Aizawl, Mizoram-ah thlen a ni.

 

 

Hawnna inkhawmah Governor chuan he Championship-a state hrang hrang atanga rawn tel infiammite leh an hotute chu Mizoram sorkar leh mipui zawng zawng aiawhin a lawm thu a sawi a. India hmun danga chengten hmarchhak bial chu firfiak leh hel tamna, hmun him lo leh hlauhawmah an ngai thin a, chuvangin he Championship avanga hmarchhak, a bik takin Mizoram-ah rawn zin theiha an awm leh he state muanzia an mit ngeia an hmuh chu an haw hunah pawh an awmna hmun theuhah hmarchhak chungchang thudik puangchhuak zel turin a chah a ni. India chu ram ropui, a ram mite pawh thiamna sang tak nei kan nichungin kan chak lohna ber chu kan inpumkhat tha thei lo hi a ni tih thu sawiin Governor chuan hun lo kal zel turah kan ram dinhmun chu kan thalaite kutah a awm a, he ram hi a hmasawnin a ropui zual zel tur chuan inhriatthiam tawnna, hnam ze inzahtawnna leh thawhhona tha neih a pawimawh a ni, a ti. Thalaite chu an taksa leh an chaknate chu thil tha lo tih nan hmang lovin ram leh hnam tana hlawkna tur atan hmang zawk turin a fuih bawk.

He Championship chhim tura lo kal Pu Salim Baig, General Secretary, Sepak Takraw Federation of India chuan India ramah Sepak Takraw infiamna hi thil thar a nih thu a sawi a. Mizoram phei chu he infiamnaah kum 2 vel awrh chauh tel mahse India pumah 3-na an nih thu leh Mizoram Team Player Chhunglawmzuala chu kumin Bali-a khawvel pum huap Sepak Takraw Championship-ah India Team-ah a tel ve tur thu a sawi bawk.

Vawiina 3rd Federation Cup Sepak Takraw Championship tan tak chu 21-22 April, 2009 chhung khelh a ni dawn a. He Championship-ah hian Mipa Team 8 - Manipur, Assam, Nagaland, Maharashtra, Delhi, Uttar Pradesh, Andhra Pradesh leh Mizoram - an awm a, Hmeichhe Team 5 - Manipur, Assam, Nagaland, Delhi leh Tamil Nadu - atangin an rawn tel a ni. Players-te hi an zavaiin mi 91 an ni a, anni bakah hian refree leh official 15 lai an rawn kal bawk a ni. State pawn atanga lo kalte hi Youth Hostel, Luangmual-ah thlen tir vek an ni.