Vawiin khan Education Minister Pu Lalsawta chuan INSPIRE AWARD 2012-2013 hnuaia 3rd State Level Exhibition & Project Competition SCERT leh DIET tangkawpin DIET Auditorium-a an buatsaih a hawng. Innovation in Science Pursuit for Inspire Research (INSPIRE) hi Sorkar laipuiin ram puma sikul zirlai Science lama tui leh talent nei thate tana programme a duan a ni.

Hawnna inkhawm tawi SCERT Auditorium-a buatsaih SCERT Jt.Director Pi Sangthanmawii kaihhruaiah Education Minister Pu Lalsawta chuan INSPIRE Scheme hian rah tha a chhuak mek zel thusawiin hemi avang hian zirtirtu leh zirlai  te ah inelna boruak thianghliam a awm phah a, kan hmang tangkai hle a ni, a ti. Science chuankannitin nunah ro a rel thuk tawh a ni tiin hetianga inelna  hian nasa takin zirlai naupangte Science leh Mathematics lamah a chawk phur a, Science leh Mathematics dinhmun a chawikang a ni, a ti bawk.  Minister chuan SCERT-in kawng hrang hranga Mizorama zirlaite a tha zawnga an kaihruai zel chu lawmawm tiin Pu A. Sawihlira’n Science awlsam leh hriatthiam nuam a siam a, Mizote zingah Science tihlar leh puanzarna kawnga a sulhnu leh a inpekna te chu a ropui a tih thu a sawi bawk a ni. 

SCERT Dy. Director (SPW) Pu R.S.Chauhan chuan Inspire Award tobul sawizauin Ministry of Science & Technology-in ram pumah khaw hrang hrang leh hmun kilkhawr zawka cheng zirlai Science lama talent nei tha tak tak te haichhuahna  hmanrua a nih thu a sawi a. Inspire Award inelnaa zirlai tel zawng zawngte chuan Rs.5,000/- an dawng theuh a, hetah ti tha zualte chu National Level inelnaah an thawn leh thin thu a sawi bawk. He hunah hian MBSE Chairman Rev. Dr. Lalchungnunga pawh telin thusawina hun a nei bawk a ni.   

INSPIRE Awards hnuaiah hian kum 2010-11 khan sikul 893 atangin zirlai 1589 te hnenahRs. 5,000 theuh (a zavaiin Rs.79,45,000) sem a ni tawh a. Hetiang bawk hian kum 2011-12 khan sikul 509 atangin zirlai 818 ( a zavaiin Rs. 40,90,000) leh kum 2012-13 hian sikul 802 atanga zirlai 802 (a zavaiin Rs.40,10,000)  hnenah Rs. 5,000 theuh a sem a ni tawh bawk.

Inelnaah hian zirlai 62 an tel a, Jury te chu Prof. Lalnundanga, Dept. of Forestry, MZU; Prof.S.K.Mehta, Dept. of Botany, MZU leh Pu Lalrinthara Pachuau, Asst Prof., Physics, PUC te niin model te hi an endik a ni. A tih tha zual panga te chu Mizoram aiawhin national level ah an tel dawn a ni.