Vawiin khan 23 Sector Assam Rifles hnuaia 46 Assam Rifles bultumin Battalion HQ-a Loch Hall-ah Ex-Servicemen Rally buatsaih a ni a. Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu Khuallian niin, he Rally hi a hmanpui a ni.

Lt. Gen. Nirbhay Sharma chuan ex-servicemen te hamthatna tur leh ram ralmuanna atana Assam Rifles te hnathawh chu fakawm a ti a. Sipai pawl hrang hrang te chu khawtlang tana a huhoa thawk turin a sawm a. Mizoram kiltina an awm avangin, an tawnhriatte leh finnate chu khawtlang tana chenfakawm a ni thei a ti a. Hun reitak uniform ha in ram tan hun lo hmang tawh mahse, an chawlh hnua  huntha an neih chu ram tana pek let ve na hun remchanga hmang turin a duh a ni. Governor chuan India Hmarchhak ramah hnam chi hrang hrang 200 chuang zet an awm a, chung hnam tinte tan State neih a remloh thu sawiin, Ex-Servicemen te chu inunauna thu puangdarhtu nise a duh thu a sawi a. Hindi zir kawngah te, hrisel zawka nun danah te, thiam thil tihpunah te leh mahni fate sipai atana chher kawngah mawhphurhna hlen tur kan nei a ni, a ti. Mizoram leh sawrkar laipui hnuaia mahni kutkawiha eizawnna scheme awmte chu chhawr tangkai turin a chah bawk a ni.

Brig. MS Mokha, SM, DIG 23 Sector Assam Rifles chuan Rally-a kalkhawmte chu lo lawmin, harsatna hrang hrang an neih te chinfel sak an tum thu a sawi a. Veer Naris leh Gallantry Award dawngtute chawimawina neih a ni bawk.