Vawiin khan NEDP-Entrepreneurship Development Scheme bultuma National Institute of Medium and Small Scale Micro Enterprise (NI-MSME), Hyderbad-a kal tur Master Trainer tur te Mizoram Youth Commission Chairman Pu Joseph Lalhimpuia chuan thlahna hun Economics & Statistics Conference Hall, New Secretariat Complex-ah a hmanpui.

Pu Joseph Lalhimpuia chuan Master Trainer (2^nd Batch)-te hnenah fuihna thu sawiin, midangte hnena hrilh chhawn leh tur hriatna zau zawk rawn neiturin leh an hnathawhna hmun theuha midang te hnena an pek chhawn tur mahni kut leh ke a eizawnna (Entrepreneurship) chungchangah rawn hawn turin a chah a. Mizoram hi kan ram neih chhun a nih avangin thalai te zingah ram hmangaih kan lantir nan eizawnna nghet, midangte tan leh ram hmasawnpui tur kan kalpui zel a pawimawh a ni, a ti a. Training-na hmuna thiamna chi hrang hrang an zuk chhar chhuah te chu midang te tan malsawmna ni turin Master Trainer tur te chu a sawmin, NI-MSME, Hyderbad-ah hian duh duha luh mai theih a nih loh avangin thahnem ngai taka training-na rawn hmang tangkai thiam turin a ngen bawk a. MEDMOC (Mizoram State Entrepreneurship Development Monitoring Committee) leh MYC (Mizoram Youth Commission) te chuan tuna Master Training-na a kal te hi anla hmang tangkai zel dawn a, chuvangin neitu chan changin thahnem ngai turin chah a ni.

Master Trainers te thiamna leh kaihhruaina Mizoram a mipui tam zawk, district hrang hrang leh thingtlang kilkhawr zawk a mi ten an lo chhim theih nan tunah hian Master Trainers (2^nd Batch) sawm thlan chhuah anni a. Training chhung hi 16^th-20^th April, 2018 niin, naktuk ni 14.4.2018 ah Hyderbad an pan ang. Second Batch Master Trainers te hi District pasarih atangin College zirtirtute, Mizoram Information Service (MIS) pakhat leh Mizoram Civil Service pahnih te anni a. Training zawh hunah District hrang hrang a school leh college-ah te training an pe chhawng ve leh dawn a ni.

Thlahna ah hian Planning Secretary leh Master Trainer (1^ST Batch) leh MEDMOC hruaitute an tel a ni.