Vawiin  khan Archives Hall,Babutlangah Zo Flower Arrangement ( Whatsapp) Group  buatsaih Pangpar khawi Bu  chu Pi Lal Riliani,Mizoram Chief Minister nupui in a tlangzarh. Lehkhabu hi Rs.500/- man ani a, tlangzarhna  hmunah Rs.400 /-  in a lei theih nghal.

Whatsapp group atang chauhva inhria leh inhmelhriat chawp, nu buai tak tak  in  lehkhabu tha tak leh changkang tak an  chhawpchhuak thei chu faka lawmthu hrilhin khuallian Pi Lal Riliani chuan an group hnarkai tute zingah mipa fel tak tak hmuh tur an awm avangin lawmawm a tih thu a sawi bawk. Ram changkang zawkah te  chuan mipa hi pangpar lam buaipui tu an ni ber thin a,tunah kan ramah ngei helam kawngah mipa an lo penchhuak hi hmasawnna rahbi pakhat ani  a, pangpar khawina leh pot ilo vel han chawisawn kawngah te an chak zawk a, Zo Flower Arrangement group tan  pawh chhenfakawm tak an nih a beisei thu a sawi.

Pangpar chungchang hi chu a hriat tam vak loh thu leh  mawi erawh chu a tih em em  laiin  a pasal Pu Lal Thanhawla zawk chu pangpar ngaina tu zawk leh hmun dang an zin pawha a remchan dan anga an hawn fo thu  Pi Lal Riliani chuan sawiin, hla phuahtu te pawhin  pangpar hi hla ah an phuah fova, kan ram sik leh sa  leh leilung hi pangpar te hian an  ngeih a, Lengpui  Airport  pangpar te phei chu  hnamdangte pawhin  hmuhnawm an tih thu leh an sawi fo thu   sawiin Pangpar te hi thihni a inthlah nan chauh hmang lovin  damlai ngeia  inpek te hi chinfo atana a that  thu a sawi bawk.

Taksa hriselna leh vawn thianghlim a pawimawh thu sawiin  khuallian chuan  Ei leh in, zuk leh hmuam  ah te invawn uluk leh insum a ngaih thu  leh upat hnuah pawh in uluk a ngai a, kum upat vang  ringawt in  tar tum loh tur ani  a ti a. A mamawh apiangin tangkai taka an hman turin  Zo Flower Arrangement  chu  a release  a ni.

Vawiin Lehkhabu Tlangzarh  programme  Pi Lalnghakliani kaihhruai ah hian Pi Zonunsangin  report a pe in  PNl.Lalrinchhani, HEO in lehkhabu    chungchang a sawi hawng a. Pi Khawvelthangi’n  lawmthu a sawi a, zaithiam  tak tak zaite ngaihthlak a ni.