Vawiin khan Deputy Chief Minister Pu Tawnluia chu Mizoram Police Raising Day Vawi 48 Lawmna, AR Lammual-ah Khuallian niin, Minister of Sports & Youth Affairs Pu Robert Romawia Royte chu Khualzahawm a ni.

Khuallian Pu Tawnluia chuan Mizoram Police Raising Day Vawi 48 Lawmnaa sawm a ni chu lawmawm tiin, kalkhawm zawng zawng te hnenah chibai a buk a. Mizoram Police, Kum 48 a upa a lo nih tanni lawmna peng pakhat, Football Final Match khelte hnenah duhsakna a hlan a. Football Match chu rilru sawi zawina leh taksa sawi zawi nana hmang thiam turin leh thawhhona tha a pawimawh a ni tih an hriatnan Mizoram Police Raising Day chu Police Unit zawng zawng ten lo hmang thar leh se tiin duhsakna a hlan a. Hmasawnna tha zawk neih a beisei thu leh Police ten Mizoram ah administration tluang taka a kal theih nana hna an thawh zawng zawng te chu fak tlak an ni, tiin a sawi bawk a ni. 

Khualzahawm Pu Robert Romawia Royte chuan a bika police tan fitness a pawimawh zia sawiin, a pawimawh zia hriaa DGP te leh officers dangte'n hma an la chu lawmawm a tih thu a sawi a. Mizoram Chief Minister Pu Zoramthanga leh Khuallian Pu Tawnluia te thahnem ngaihna azarah Mizoram ah Football Playground Sawmpathum siamthatna phullem siamna tur tih fel a ni tawh a, Hockey Ground Pakhat siamna tur tih fel tawh a nih bakah, Badminton Court tha tak leh, Indoor Stadium lian sakna tur te pawh buaipui chho mek a ni, tiin a sawi a. Football Playground Sawmpathum zinga pakhat chu Home Department in a tha a tihna hmuna siamtur a ni ang, tiin a sawi bawk a ni.

Mizoram Police Raising Day denchhen hian Football Final Match Zone III leh Zone V ten an khel a. Zone III te hi 2nd IR Bn., Champhai DEF, Khawzawl DEF te an ni a. Zone V hi 1st Bn. MAP, PHQ, MPRO, CID (Crime), CID (SB) te an ni a, Zone III hian 3-2 in Zone V te an hneh a ni.