4th State Anti Tobacco Day leh World Suicide Prevention Day chu vawiin khan CMO Conference Hall, Kolasib-ah hman a ni.

Hun hi Dr. Lalhlimpuia, CMO in  kaihruaiin, kalkhawmte Vaihlo hmanglo tura intiamna hun a neihpui nghal a. Dr. R.K. Lalthlamuana, SMO in  hriselna atana vaihlo thatlohna leh vaihlo khuahkhirhna dan zirtirna a pe a. Kolasib District a National Tobacco Control Programme kalpui dan Lalnunpuii Varte (Social Worker) in a pe a ni. World Suicide Prevention Day pual a hun hman tel nghal a nih angin Pi Helen Lalnunmawii Sailo, Psychologist, Mental Health Programme mahni nunna lak ven dan chungchang a sawi bawk.
 
Tin, hei bakah hian, Deputy Commissioner, Kolasib in office zawng zawng a an remchan dan anga vaihlo do ni hi lo hmang tura hriattirna a ti chhuak a, sorkar office hrang hrangah a remchan dan anga hman a ni. Vawiin ni vek hian vaihlo do tha lawmman 'Outstanding Award for Exemplary Performance by a Hospital in Government and  Private Sector for the effective and sustained action towards the enforcement of Cigarettes & Other Tobacco Products Act 2003' chu District Hospital, Kolasib hmingin District Nodal Officer Dr. C. Vanlalhlimpuia'n Chief Minister Pu Lal thanhawla hnen atangin a dawng bawk a ni.

National Tobacco Control Programme, Kolasib District hnuaiah hian kum kallai mekah hian School 32 tlawh tawh niin, kohhran 8 tlawh a ni bawk a. Anti-tobacco Squad Drive vawi 63 neihah dan bawhchhia 189 man an ni a. Vaihlo nghei tura inenkawl 594 ah 26.19% ten an nghei a ni.