World Suicide Prevention Day 2017 chu Department of Psychiatry leh National Mental Health Programme (NMHP), Health Department buatsaihin vawiin khan Chanmari YMA Hall-ah hman a ni a. Health Minister Pu Lal Thanzara chu khuallian niin Health Principal Director Dr.F.Lallianhlira chu khual zahawm a ni.
Pu Lal Thanzara chuan dam thlahlel tawh lo hial khawpa mi beidawngten beiseina thar an neih leh theih nan mi tinte hian tih theih kan nei tih hriain World Suicide Prevention Day-ah rilru thar pu turin kalkhawmte a sawm a. Mahni nunna lak tum, dam chhuak lehten an nuna harsatna vawrtawp an tawh laia an chanchin ngaihthlaksak leh hriatpuitu an thlakhlelh thu leh an thil tum ruk rapthlak tak lak ata chhanchhuaka, kawng dang kawhhmuh theitu an nghahhlel zia an sawi atangte in thiamna hranpa nei velote pawhin an tan tihtheih kan nei tih a lang chiang a ni, a ti. Heng mite hian ngaihsaktu leh ngaihventu an mamawh a, an harsatna tawhte sutkian sak theilo mahse, an tana minute khat chauh tal pawh kan sen hian mihring nunna hial kan chhanhim thei a ni, Minister chuan a ti bawk.
World Suicide Prevention Day hi kum 2003 atang khan September ni 10 hi International Association for Suicide Prevention leh World Health Organisation te hmalaknain khawvel pumah mahni intihhlum tumte chhanhimna kawnga hma kan sawn theihna tura inzirtirna hun atan hman a ni a. Kumin hi a tum 15-na niin “Take a minute, change a life” tih chu kumin thupui atana thlanchhuah a ni. September ni 10 hi Pathianni a nih avangin Mizoramah chuan September 11, Thawhtanni hian he ni puala hun hman a ni.
Health Minister Pu Lal Thanzara hian rilru hriselna lama Mizoten hma kan sawn theih nana buatsaih music video "It's alright, it's okay" tih a tlangzarh nghal a. He hunah hian 'Suicide prevention hi professional-te chauh tih tur a ni' tih thupui hmangin debate neih a ni a. Govt. Hrangbana College, Pachhunga University College leh Govt. Aizawl West College atangin zirlai pahnih theuh an tel a. Opposition Team te chu champion a puan niin Best Debator-ah R.C.Vanlalawmpuia, Hrangbana College chu thlan a ni.
