Vawiin khan Horticulture Minister Pu P.C.Lalthanliana hovin Horticulture Directorate Conference Hall-ah District 8 huamchhunga department hmalakna hrang hrang kalpui mekte thlirho a ni a. Horticulture Director Dr.K.Saipari kaihhruai vawiina review meeting-ah hian Horticulture Jt. Directors Pu Rosanglura Ralte leh Pu K.Lalduhawma bakah District 8-a DHO leh officials te an tel kim hle.

Horticulture Department officials kalkhawmte fuihna thu sawiin Minister chuan Mizoram sorkar flagship programme NLUP hnuaiah farmer-ten Horticulture thlangin kalpui mek a ni a, heng farmer-te an lo hlawhtlin theih nan department officials leh staff ten theihtawp an chhuah thin chu a lawmawm takzet a ni, a ti. NLUP hnuaia 3rd leh 4th final installment pawh semchhuah theih turin a peih mek thu leh Mission for Integrated Development of Horticulture (MIDH) hnuaia sum hmuh tur 50% chu release a nih tawh thu a sawi a. NEDP hnuaia hmalakna avangin Mizoram-ah thal zikhlum (off-season cabbage) thar zel a ni a; kum danga tih loh angin a ruala phun lovin, a inchhawka phun tir a nih tawh avangin kumtluanin zikhlum lei tur a awm tawh a, hei hian phai lam atanga zikhlum lakluh thin pawh a titlem phah hle a ni, a ti bawk. Zikhlum bakah natna chi 3 do thei tomato pawh Tuipui-ah phun chhin a ni mek a, hei hi a hlawhtlin chuan tomato-ah pawh Mizoram chu a intodelh hle tawh ang, a ti bawk. Thlai dang - strawberry leh dragonfruit - te pawh chin hlawhtlin zel a nih chu Minister chuan lawmawm a ti hle bawk a. Farmer ten thlai chi tha an phun a pawimawh ber a, thlai chi tha lo an phun palhin farmer ten sum leh kum an hloh thin a, chuvangin thlai chi (planting material) tha lo chu department-in a hnawl zel ngam tur a ni tiin officials-te a chah.

Vawiin review meeting-ah hian district 8 atangin an hmalakna leh hlawhtlinna tarlanna power presentation hmangin enho a ni a. Meeting agenda-ah 1). Action Plan 2017-2018, 2). NLUP hnuaia hmalaknate leh NEDP hnuaia sum mamawh zat leh hmalak zel dan tur, 3). Rampawna training-na (tour) tur, 4). Rabi crops thlai chi chungchang, 5). Pack House leh Green House siam belh chungchang leh 6). NEC chungchang te sawiho a ni.