3641/2024-2025

Dated Agartala, the 21st December 2024: Vawiin khan Pragna Bhawan, Agartala, Tripura-ah NEC Plenary Session vawi 72 na, Pu Amit Shah, Union Home Minister, Chairman, NEC ni bawk kaihhruaia neih a ni a. Chief Minister Pu Lalduhoma chuan thusawiin NEC kal zelna tur leh India hmarchhak bial hmasawnna tur thil pawimawh tak tak te a thlen.

Chief Minister chuan, Viksit Bharat 2047 tihhlawhtlin nan leh DoNER Ministry hmalakna tihlawhtling zual turin Mizoram sawrkar chuan world class infrastructure nena thuam Industrial Zone din kan duh a, entreprenuer lamah sang tak thlen tumin Bana Kaih Scheme kan tlangzarh tawh a, dilna pawh sing chuang a lut tawh a ni. Kum reiloteah sustainable development goals leh employment siam belh lamah kan than chhoh ngei kan ring, a ti.

Tunhnaia central sawrkarin NEC leh DoNER Ministry budget a tihpun vang te, DoNER Minister Pu Jyotiraditya M. Scindia in kawng engkimah phur tak leh inhawng taka a thawhpui vang tein lawmthu a sawi a. Prime Minister Pu Narendra Modi-an, "Hmarchhak bialte hi India ram economic powerhouse ni thei khawp hiala theihna (potential) nei an ni" tia a lo sawi tawh angin hmarchhak bialah hmasawnna chak taka kalpui turin remna leh muanna boruak tha tak siam a ngai a, theihtawp i chhuah ang u, tiin a sawm.

Chief Minister hian, NEC chu chak lehzuala a kal theih nan full fledge Secretary ruat fel thuai ni se, power sector leh IFC & WSM lamah NEC hi thunei zawkin awm leh se. AMRUT-2 fund hi tam zawk leh khawpui lam tuilakna thawh nana hman theihin awm se, normative budget allocation a state chanvo hi tihsan ni se. DoNER Ministry kal tlanga project thehluh te kalkawng thui leh rei lutuk hi awlsam zawka kalpui dan dap ni se, 10% GBS hi awmze nei leh tam zawk kan hman theih nan DoNER hian Finance Ministry nena hma lain state sum indaih lohna laia project lian leh rotling thawh nana hman turin ruahman se. Kan mipui tam ber te innghahna Agriculture lama hma kan sawn theih nan Ministry of Jal Shakti hnuaia Command Area Development Programme funding pattern hi 50:50 ni lovin 90:10 ni thei se, tih te leh thil pawimawh dang te a thlen a ni.

72nd Plenary ah hian NEC Vice Chairman leh DoNER Minister Pu Jyotiraditya M. Scindia, Union Minister of State for DoNER, Dr. Sukanta Majumdar leh hmarchhak state Governor leh Chief Minister te, official pawimawh tak tak te an tel a. Mizoram Chief Minister hi Pu TBC Lalvenchhunga, Adviser to CM, Pi R. Lalrodingi, OSD to CM, Pu K. Saitluanga, PIO to CM leh Pu C. Lalhmunliana, Addl. PS to CM ten an tawiawm a ni.