3642/2024-2025

Aizawl, the 21st December, 2024: North Eastern Council (NEC) Plenary Meeting vawi 72-na chu vawiin khan Pragna Bhavan, Agartala, Tripura-ah Union Home Minister & Chairman, NEC Pu Amit Shah kaihruaiin neih a ni a. He hunah hian Mizoram Governor Dr. Hari Babu Kambhampati, NEC Member chu telin thu a sawi.

Mizoram Governor chuan DoNER Ministry kaltlanga investment hip tura hmalakna fakawm a tih thu sawiin, Mizoram pawhin Inter-departmental Investment Promotion Cell (IPC) dinin, Tourism & Hospitality leh Skill Development-ahte thawkdunin investor-te nen hmalak mek a ni, a ti a. Mizorama khua 118 te chu kum tluana zawh theih kawngpui thain a la pawh loh avanga furpui hunlaia tlawh pawh harsa a nih mek thu leh PMGSY hnuaia siam tur pawhin ami chengte an tlem avanga danin a remtih loh thu a sawi a. National Mission on Edible Oils-Oil Palm (NMEO-OP) chu Mizoramah kum 2021 atanga kalpui a nih thu sawiin, oil palm tiak duhkhawp a awm loh avang leh a phurh chhuahna kawngpui that tawk loh avangtea hmalakna zauh a har rih thu a sawi a. North East chu organic farming-a hma la tha a nih thu sawiin, Department of Commerce leh APEDA-te nen thlai thar hralhna lam ngaihtuah tlan a tul a, hemi tur hian North East tan bik organic certification agency din a tul a ni, a ti bawk.

Dr. Hari Babu Kambhampati chuan DoNER Ministry-in growth centre 24 leh border centre 20  tinzawna North East Economic Corridor din tura ruahmanna a neih mek chungchangah ram dang atanga investment partner tam zawk hip turin Ministry chu ramri kaltlanga insumdawntawnna ngaipawimawh turin a ngen a. Industry 4.0 leh National Education Policy 2020 kaihhnawihah vocational education chuan Mizoramah dinhmun pawimawh tak a luah thu sawiin, DoNER leh NEC hnenah Skill Development Centre tha ber ber din a tul thu a thlen a. State Sawrkar hnuaia Industrial Training Institute-te pawh tihchangtlun a tul thute, khawpui lian zualah handloom leh handicraft bakah oraganic thlai pho chhuahna tur 'common exhibition centre' mamawh a nih thu a sawi bawk.

Governor chuan India hmarchhak State-te tihhmasawn nana Sawrkar laipui hmalaknate fakawm a tih thu sawiin, tunhnaia 'Ashtalakhsmi Mahotsav' neih zawh taka PM in North East India chu India ram bung pawimawh tak a nih thu leh Sawrkarin hmathlir awmze nei tak hnuaia Act East Policy kalpui zel a tum tih a sawi chu lawmawm a tih thu a sawi a. DoNER Ministry leh NEC te'n North East Region Vision, 2047 tha tak an siam chu fakawm a tih thu a sawi bawk.

He hunah hian Union DoNER Minister & NEC Vice Chairman Pu Jyotiraditya Scindia, Union Minister of State for DoNER Dr. Sukanta Majumdar, hmarchhak State-a Governor leh Chief Minister-te bakah NEC Member dangte leh Official pawimawh tak takte an tel a ni.