Vawiin chawhma khan Directorate of Economics & Statistics Conference Hall, Aizawl ah Pu Lalrikhuma Sailo, Director, Economics & Statistics chuan 7th Economic Census buatsaih nana inpuahchahna hrang hrangte kalpui tan anih theih nan a tlangzarh a, Common Service Centre e-Governance Services India Limited, National Trade Union of Mizoram (NTUM) aiawhte leh Directorate of Economics & Statistics a thawktuten he hun hi an telpui a ni.

Pu Lalrikhuma Sailo, Director, Economics & Statistics chuan Economic Census pawimawhna hrang hrangte tar langin,” Kan inpuahchahna leh hma kan lak tawhnaah State ti thate zingah kan la tel zel a, Census hna kalpui anih chhung hian thawktute an pawimawh rualin mipuite thawhpuina leh tawiawmna a pawimawh hle dawn a ni,” a ti a, Economic Census rintlak leh felfai tak buatsaih a nih theih nan thawktuten an mawhphurna leh chanvo tha tak a hlen chhuak turin a chah bawk a ni.

7th Economic Census thawh tan anih theih nana tlangzarhna hun hi Pu Saithanzuala, Joint Director, Economics & Statistics in kaihruaiin,’ Economic Census chu kawng hrang hranga kan ram dinhmun hriatna hmanraw pawimawh tak a ni,’ a ti a,’ Kan dinhmun a zira hma lak dan tur te, ruahmanna siam dan turte bakah inenlet nana thil tangkai tak a ni,’ a ti bawk. He hunah hian Economic Census neih nana inbuatsaihnate tarlan niin Pu B.Lalrinhlua, Deputy Director leh Pu Frankie Zonunmawia, Asst. Manager, CSC ten 7th Economic Census kalpui dan turte an sawi a, Pu Malsawmdawngliana, Inspector of Statistics in lawmthu sawina hun a hmang bawk a ni.

7th Economic Census hi Digital India zulzuiin Paperless a kalpui tur a ni a, Mobile application hmangin Supervisor 141 leh Enumerators 620 ten Mizoram pumah Economic census hna hi in tina kalin hna na thawk dawn a ni. 7th Economic Census hi vawiin ni 22 August 2019 atangin Mizoramah thawh tan a ni a, thil tul pawimawh lakkhawmna atan thla 3 leh data verification hian thla khat leh a chanve dang awh tur a ngaih a ni. Economic census kum 5 dana tih thin chu kum thum dana tih tawh tur a ni a, sum siam theihna hmun, sumdawnna in te ber atanga a lian ber thleng Economic census hian a huam a ni.