Higher & Technical Education Minister Dr. R.Lalthangliana’n vawiin khan Govt. T. Romana College-ah “First Aid training and Awareness Campaign on Drug Abuse” hun a hmanpui. He programme hi Govt. T. Romana College Health Cell, Equal Opportunity Cell, RUSA, National Service Scheme (NSS) leh Students’ Support, Progression & Placement Cell te tangho buatsaih a ni a, College a 1st Semester zirlaite puala buatsaih a ni.

Higher & Technical Minister Dr. R. Lalthangliana chuan zirlai kalkhawmte fuihna thu sawiin Aizawl khawpui chhunga College hmun leh zirtirtu nei tha berte zing ami an ni a ti a. College chhungah Aizawl khawpui zirlaite leh thingtlang atanga lo kal zirlaite tan zirtirna an dawn dan a in ang reng a, thiamna duh tak taka zirlaia rilru pe te tan hun remchang a in hawng dawn a ni a ti a. Zirlaite chu rilru leh taksa hriselna uluk tura chahin malsawmna leh chhiat vekna hi keimahni ah theuh hian a awm vek a, khawi zawk hi nge kan thlan dawn tih mahni theuh i inzawt fo thin ang u a ti. Minister chuan damrei tur chuan nun uluk a ngai a, mithiam tak an thiamna pawh Mizoram tana tangkai tak tur pawh nise an nun a tawi chuan an thiamna khan awmzia a neilo thin a, kan tawp hun tur kan hrelo a mahse damrei turin kan nun uluk leh ruihhlo laka fihlim hi chu kan ti ve thei a ni a ti a. Zirlaite chu Mizoram hmalam hun innghahna an ni tih inhria a tunlai hunah chuan thiamna tak tak a ngai tawh a ni tih hre bawk tura chahin average student ni a thiante ruala in bang  liam ve mai mai tawk leka lungawi lova, chhawr tlak thiamna nei ngei tura zirlai hlawhtling ni vek turin fuihna leh duhsakna a hlan a ni.


Vawiina First-aid leh ruihhlo hmansual laka inven dan tur inzirtirna hunah hian mithiam sawm bik pathum – Pu H. Ngurthansanga, Vice-Principal, Govt. Mamawii Higher Secondary School, Pu Chawngthankima, District Education & Media Officer leh Dr. Lalramsanga, Medical Officer, Emergency Department, Civil Hospital, Aizawl ten zirtirna an pe a. Zirlaite zingah a duh apiang tan ruihlo laka fihlim tura intiamna hun siam a ni bawk.

Government T. Romana College hi kum 1992 khan mithahnemngaiten an din a, kum 2003 ah Deficit-ah hlan kai niin kum 2007 ah Sawrkar College a hlankai a ni a, Arts Subject zirna hmun niin tunah hian Course hrang hrang 8 – English, Mizo, History, Political Science, Public Administration, Economics, Sociology leh Education te a zir theih a ni. NAAC Accreditation ah B-Grade ni mekin tunah hian zirlai 1226 an awm mek a, 1st semester zirlai hi 534 an awm a ni.

Attachment

  • Loading attachment...