Vawiin khan Synod Conference Centre, Aizawl-ah Mizoram State Commission for Women (MSCW) leh National Commission for Women (NCW), New Delhi tang kawpin Legal Awareness Programmes on Laws Related to Women an buatsaih a. Hon’ble Speaker Pu Lalrinliana Sailo chu khuallian niin, Information & Public Relations Department Director Pi Lallianpuii, MIS chu khualzahawm a ni. He hun hi  MSCW Chairman Pi Lallawmchhungi’n khaihhruaina hun a hmang a ni.

Khuallian Pu Lalrinliana Sailo chuan India ram Danpui in a sawi angin, hmeichhiate zalenna zah sak leh zahawmna humhim chu tih makmawh a ni, a ti a. Sawrkar hmalakna ah leh a theihna a piangah ngaih pawimawh a ni thin a, chutih rual chuan hmeichhiate chawikanna kawngah tihtur tam tak a la awm a ni, tiin a sawi a. Pu Lalrinliana Sailo chuan hmeichhiate dinhmun chungchangah mizo nunphunga bet tlat,  mipa zawng zawng deuhthaw ina kan la ken si hi a la awm a, tun dinhmunah chuan rilru thar put a ngai lehzual a ni, tiin a sawi. Hmeichhiate zahawmna vawng theitu chu mipa te hi an ni, a ti bawk a ni.

Khualzahawm I&PR Director Pi Lallianpuii chuan thu sawiin, MSCW in a hmeichhiate tana Dan awm hrang hrang zirtirna hun tha tak a buatsaih chu lawm awm a ti a. Dan hrang hrang zirtur atana mithiam te’n an chhawpchhuah chu tangkai taka zir a nih theihnan kalkhawmte chu duhsakna a hlan a ni.

Chawimawina mi pathum hnenah hlan an ni a, chungte chu:

1.    Lalremsiami, Hockey Player
2.    Grace H.Lalrampari, Football Player
3.    Caroline Malsawmtluangi, Naupang Huaisen

He hunah hian The Mizo Marriage, Divorce and Inheritance of Property Act, 2014, India Dan Hnuaia Hmeichhiate Chanvo leh Rorelna Court, The Protection of Women from Domestic Violence Act, 2005 te zir ho a ni a. Mizorama kohhran hrang hrang hmeichhe hruaitu, MHIP leh Central YMA aiawh leh midangte an tel a ni.

Mizoram State Commission for Women hi Kum 1988 ah din a ni a, Commission Member 5 leh Legal Cell Member 5 an awm mek a ni.

Attachment

  • Loading attachment...