Vawiin khan David Lalrinawma Memorial Chess Championship vawi 8-na chu Electric Veng YMA Hall-ah Parliamentary Secretary Pu Lal Thanzara’n a hawng.

Hawnna inkhawm Mizoram Chess Association (MCA) President Pu Rochhunga Ralte kaihruaiah hian Pu Lal Thanzara chuan Chess chu infiamna namai lo tak, thluak hmanga inbeihna a nih avangin a khel thinte pawh mi pangai chunglam nia a hriat thu a sawi a. Chess hian hmalam thlir dan min thiam tir a, thil hrang hrang hmachhawn dan tur min zirtirin thutlukna siam dawn pawhin fing taka inngaihtuaha fimkhur nachang min hriattir thei a ni, a ti. Nakkum January thlaa Mizoramin a vawi khatna atan North East Chess Tournament athlen turah pawh Pu Lal Thanzara chuan theihtawpa lo tawiawm leh a tul ang apianga tha lo thawhpui ve a huam thu MCA hruaitute a hrilh a ni.

MCA General Secretary Pu P. Lalchuanpuia chuan an pawl hmalakna tlangpui sawiin kum 2012-2013 term an hmang tan mekah MCA chuan sorkar policy ‘Catch Them Young’ bawhzuiin 4th-13th January 2012 chhung khan a vawi khatna atan Grandmaster chah chhuakin U-19 tan Chess Coaching an buatsaih thu a tarlang a. Mizoram Chess Assication hi 1976 khan din tan a ni a, 1977-ah All India Chess Association hnuaiah affliated nghal a ni. Mizoram District tinah Chess Association felfai taka kalpui mek niin coaching leh tournament te buatsaih a ni thin a, tunah hian MCA hnuaiah affliated club 100 chuang an awm mek a. Ramchhung Chess khawvelah pawh Mizo 10 chuang zet chu ‘rated player’ an ni nghe nghe a ni.