Ni khat awh Public Distribution System Programme Training chu vawiin khan Vanapa Hall-ah Food Civil Supplies & Consumer Affairs Department chuan Local Council Member te tan an buatsaih a. He hun hi FCS & CA Minister Pu H. Rohluna’n a hmanpui.
Supply Minister Pu H. Rohluna chuan Local Council member kalkhawm te hnenah mipui thlanchhuah, mipui rawngbawltu an nih avangin mipui ten an chanvo tur dik tak an chan theihna tura theihtawp chhuah a tan tlan chu an tih tur a ni, a ti. Buhfai ani emaw, chini a ni emaw, kan nitin mamawh essential commodities khua leh tui te hnena hniang hnar taka pek chu sorkar ngaihpawimawh a ni a, sorkar laipuia tlaktlum vang ringawta Mizoram Budget hi tihpun theih ni lovin Planning Commission-in inkaihhruaina dan fel tak a neih hmangin State tin te thawh chhuah milin Budget hi siam sak thin an ni zawk, a ti.
Tunlai eirawngbawlna Gas harsatna bul ber pakhat tarlangin Minister chuan International market-a Gas man a pun chak em avanga rampumah Gas a harsat thu leh Gas chawlut tu Company ten sum tam tak an hloh avanga a lakluh lam an tih tlem tak thu a sawi a. Mizoram chawmtu ber Guwahati Refinery a technical lama harsatna a awm thu te, National Highway-39 Economic Blockade avanga Gas kan dawn tur tam tak Borkhola Bottling plant atanga Manipura pawhpen a nih thu te, Gas Bullet Driver leh transporter an nawrh fo thu te leh Guwahati Refinery a kangmei chhuak avanga kar hnih zet Refinery khar a nih thu te sawi nawnin heng hian tunhnaia Mizorama Gas harsatna tam tak a thlen a ni, a ti. Hetihlai hian Supply Minister chuan theihtawpchhuaha mipui te mamawh phuhru tura tan a lak thu tarlangin New Delhi ah sorkar laipui a Secretary te a hmunah dawra Mizoram harsatna an thlenthu te leh a ni pawhin theihtawp chhuahpui a lo tiam thu a sawi a, Mizoram Chief Minister pawhin Union Minister Jaipal Reddy-a hnenah lehkha ziaka Mizoram harsatna a thlen tawh dan te a tarlang bawk. Hetichung hian hmarchhak State-ah chuan Consumer awm zat chhutin Mizoram chu dinhmun ziaawm ber pawl a nih thu Minister hian a sawilang a ni.
Mizoram harsatna sawipui turin FCS &CA Minister sawmna angin May ni 18 hian North East a Indian Oil Company hotulu ber, General Manager a rawn zin dawn a ni.
Vawiina Local Council Member te tana Public Distribution System Programme Training kaihhruaitu FCS &CA Secretary leh Director Pi M Zohmingthangi chuan mipui rawngbawltute theuh an nih avangin sorkar, Local Council te leh tlawmngai pawl hrang hrang YMA leh a dangte nena tan tlan a pawimawh zia sawi langin hei hian mipui ten an chanvo tur dik tak an chan na kawngah kawngro thui tak a su ngei ang, a ti.
FCS &CA Jt. Director Pu Lalduhthanga; Deputy Director of Accounts Pu Laldinpuia; DCSO ‘W’ Pu C. Zasanga bakah FCS &CA Asst. Director Pu F. Lalawia ten thupui hrang hrang hmangin khawtlang hruaitu te tana hriattur an zirtira, sawihona hun an hmang zui nghal a ni.
