Mizoram Basketball Association (MBBA) leh Education Department tangdun chuan kum 2009 atang khan school-te tana Basketball Championship an buatsaih chho zel a. Kumin hi a vawi 8-na niin M/S, H/S leh HSS Final Match-te chu vawiin khan Hawla Indoor Stadium, Republic Vengthlangah khelh a ni a. Parliamentary Secretary i/c Sports Pu Hmingdailova Khiangte chuan lawmman semin Championship kharna hun a hmanpui.
8th Inter School Basketball Championship Finals leh kharna inkhawm MBBA Asst. Secy. Pu Lalmalsawma Khiangte kaihhruaiah Khuallian Pu Hmingdailova Khiangte chuan sports hmasawn nana sorkar hmalakna chu fakin, sports lama tuite tan chuan phurna leh chona a tling a ni, a ti. Mizote ngaihdanah zirlai sports lama tui leh inhmangte chu lehkhathiam thei lo tih a ni thin a, tunah erawh zirlaite pawhin zirna lamah inthlahdah chuang lovin infiam an thiam sawt hle tawh thu a sawi a. Pu Hmingdailova chuan zirlai nu leh pate fakin an fate zirlai bakah tuina hrang hrang an neihah tuipui leh tawiawm nachang an hre thin chu a lawmawm hle a ni, a ti bawk.
8th Inter School Basketball Championship 2016 hi August ni 16 atang khan khelh tan a ni a, hetiang hi kumina team tel dan a ni :
1). Girls : Team 8, Girls Team hi tel tur an tam loh avangin H/S leh HSS te combine-a khelh tir an ni. Middle School Girls hi Team 2 chauh an nih avangin Exhibition Match khelh tir an ni bawk.
2). Boys : M/S - Team 13, H/S - Team 22, HSS - Team 21. Final Match hi Govt.HSS leh St.Joseph’s HSS ten an khel a ni.
Basketball Federation of India (BFI) chuan rampuma state 16-te School League buatsaih tura thlante zingah Mizoram pawh a tel ve a. Tun tuma Inter School Championship hi an pawm a nih chuan Champion Team (Boys & Girls) te hi kumin December thlaa All India National School League neih turah Mizoram aiawha kal tir tum a ni.
