Nimin tlai khan Chief Minister Pu Lal Thanhawla chuan Mother Teresa, Mi Thianghlim Saint a puan, lawmna programme “Blessed Mother Teresa Canonisation Celebration”, Mother Teresa International Award Committee-in Mahajati Sadan Kolkata a an buatsaih chu khuallian niin a hmanpui.

Chief Minister Pu Lal Thanhawla chuan Mother Teresa Mi Thianghlim Saint a puan a nih hi India leh a bik takin Kristian sakhua vuantute tan ni lawmawm anih thu te leh India tan he hun hi hun chhuanawm tak anih thu te sawiin Mizoram mipui aiawhin a Canonization lawmna buatsaihtu te chu duhsakna a hlan a. Mother Teresa khan mi harsa, mi hnuaihnung, mi chanhai mirethei, damlo te, natna leh dinhmun khirh tak taka ding, khawtlang leh an chhungte ngei pawh in an ensan, an enhran leh an enliam mite tana rawng a bawlna kawngah sakhuana a thliar lova. Hetiang mi khawngaihthlak leh lainat awm, khawtlang leh an chhungte ngei pawhin an ngaihsak lo mihringte chu an nihna ang angin a hmangaihin a lainat a, an tan theihtawp chhuahin rawng a bawl sakna ropui hi khawvel a sawi tur a tam lo a ni a ti a. Sakhaw dang vuantu te pawhin amah leh a hnathawh chu ropui tiin an ngaisang hle a. Catholic Kohhranin dan anga Saint a an puan hma pawhin a nun tlawm, midangte tana a inpekna leh a mihringpuite a hmangaihna avangin mi tam tak chuan amah hi Mi Thianghlim Saint a pawmin ‘Saint of the Gutters’ tih hiala hriat a lo ni tawh a ni, a ti bawk.

Pu Lal Thanhawla chuan Mother Teresa nun tlawm mahse ropui si atangin zir tur tam tak kan nei a; mi rethei, rahbi tleu leh mi chanhai te tana a inpekna, a rawngbawlna leh an tana a hnathawh ropui khan mitin rilru a hnehin a khawih a tiin mi tam tak nunah beiseina siamsaktu a nih thu te a sawi a. Mother Teresa-i nun, a hnathawh leh a rawngbawlna chuan kan nun theuhvah hna thawk sela, mi khawngaihthlak, mi vanduai leh dinhmun khirh a ding te tanpuina kawnga theitawp chhuahin midangte tan malsawmna nih tum theuh ang u tiin he programme a kalkhawmte chu a chah a. Vatican-a Canonization ah External Affairs Minister Pi Sushma Swaraj leh a thawhpuite leh West Bengal Chief Minister Pi Mamta Banerjee an zuk tel khan India tan Mother Teresa a ropui leh a hlut zia a tilang ni a ti bawk.

Ama mimal pawhin, Mother Teresa damlai hun khan tum engemaw zat a lo hmuh tawh thu leh Kolkata-a Missionaries of Charity hmunpui a tlawh thu te sawiin Chief Minister chuan Mother Teresa bula awm kha a thlamuanthlak a ni a ti a. Mihring hmuha chuan nu lian nilo mahse, a chakna kha rinna a innghat anih avangin, a rilru, a ngaihtuahna leh a thlarau nun kha khati khawp khan a chak a. Midangte tan a nun a pumpek leh a hlanna leh a mihringpuite tawrhna, harsatna leh hrehawmna te kuangkuahin an tan malsawmna a nih dante hi India leh Kolkata mipui mai nilo khawvel in a ngai hluin a hre reng dawn a ni, a ti.

Mother Teresa Canonization lawmna programme hi Chief Justice of India lo ni tawh Justice Atlamas Kabir leh West Bengal Governor lo ni tawh Justice Shyamal Sen ten a hawnna a nei a. West Bengal Sawrkara Minister pahnih Pu Siddiqulla Chowdhury leh Pu Abdur Rezzak; Kolkata Archbishop Pu Thomas D’Souza;Missionaries of Charity, Superior General Sister Mary Prema; sakhaw dang hruaitu leh puipate; Kolkata mi challang tak tak te leh mi pawimawh dangte bakah sawmbik dangte thahnem tak an tel bawk a ni.

Missionaries of Charity hi Mother Teresa in Vatican atanga phalna a hmuh hnua 1950 velah a din chhoh a ni a. A pawl din hian tunah ram 139 ah rawngbawlna neiin Nuns 5160 vel an awm mek a, damlo leh mi harsa enkawlna in 758 vel an nei mek bawk a ni.

Mother Teresa hian khawvel a chawimawina ropui berah ngaih Nobel Peace Prize, India ram chawimawina sang ber Bharat Ratna, Asia khawmual a chawimawina sang ber Magsaysay Award bakah chawimawna ropui dang thahnem tak a dawng a. US Sawrkarin Honorary Citizenship a pek Winston Churchill bakah a pek awm chhun a ni bawk.