1544/2025-2026

Lawngtlai, 23rd September, 2025 : Vawiin khan Dr. Lorrain Lalpekliana Chinzah, Adviser to Chief Minister (Health & Family Welfare, Agriculture & Farmers' Welfare) leh Lawngtlai East bialtu MLA nibawk hovin, Lawngtlaia Head of Department ten DC Office Chamber-ah inkawmna an nei a. Pu Donny Lalruatsanga, Deputy Commissioner, chuan hun a kaihruai.

Dr. Lorrain Lalpekliana Chinzah, chuan ram leh hnam hmasawnna turin mipuite thleng phaka hnathawh a pawimawh hle tih tarlangin, hemi kawngah hian thawhho thiam a pawimawh tak zet a ni, a ti a. Mipuite tan a rawnbawl kawngah inpuih tawnna tha a awm a tul thu tarlangin, a theihna kawng apianga inpuih tawn turin Bawrhsap leh a thawhpuite a sawm a ni. A bik takin Department hrang hranga thawktu indaihlohna a hriatthiampui tih tarlangin, theihtawp a chhuah reng thu a tarlang. Lawngtlai District - in hmasawnna tur kawng hrang hrang a neihte inhrilhhriat tawn leh chumi atana thawk tura ke pen ho a tul thu a sawi a. Adviser to Chief Minister chuan mipuite tana theihtawp chhuahho turin Bawrhsap leh a thawhpuite a ngen nghal bawk.

Pu Donny Lalruatsanga chuan . Lawngtlai District- hmasawnna leh changkanna turin sawrkar department - te an pawimawh hle tih sawiin, hemi kawngah hian Department hrang hrangte thawhho thiam a tul hle a ti. Sawrkar chauh ni lovin, NGO, Kohhran leh mipuite pawhin tih theih an nei vek tih tarlangin, thawhhona tha tak neih a pawimawh thu a sawi a. Bawrhsap chuan Lawngtlai District- hmasawnna tura District Administration - ten theihtawp an chhuah reng thu sawiin, hma lam hunah pawh tha thlah lova an thawh tur thu a tarlang nghal a ni.

Vawiin inkawmnaah hian sawrkar department hotuten an hmalakna leh hmachhawp tlangpui tarlanna an nei a. Pu David Lalrinawma, Addl. DC, Pi Margaret J. Vanlalremmawii, SDO (S), leh Department atangin- Agriculture, Horticulture, Sericulture, Fisheries, Commerce & Industries, Lang Resources Soil & Water Conservation - te an tel thei a. Pu Donny Lalruatsanga chuan lawmthu sawina neiin hun a khar.