Mizoram sawrkar inrelbawl danah hlawk zawk leh tha zawka mipui rawngbawl hna thawh a nih theih dan zirchiang tura sawrkarin a din Administrative Reforms Committee (ARC) chuan Mizoram Sawrkar hnuaia Department hrang hrang an zirchianna Reports and Recommendations of Administrative Reforms Committee Volume 2 chu vawiin chawhma khan Chief Minister Pu Zoramthanga hnenah a pisaah ARC member te chuan an thehlut.

He an Report ah hian Department thenkhat FCS&CA (Legal Metrology) te, Transport Department (MST Wing) te bakah Mizoram Sawrkarin a enkawl Public Undertaking thenkhat, Board hrang hrang, Council leh Society te an zirchianna a tel a. Mizoram Sawrkar hnuaia Group C leh Group D post thenkhat outsource theih turte pawh en tel a ni. Heng bakah hian Mizoram Sawrkar hnuaia post hrang hrang, tunlai khawvela a hnathawh dan en a, post tangkai tawh lo "withering post" a puan mai theihte leh paih then (abolish) turte pawh an rawt tel bawk.

Kum 2018 a DP&AR in a din, Study Group panga ten Department sawm - PWD, Sericulture, LAD, Home, Agriculture, Horticulture, PHE, LRS&WC, Sports & Youth Services leh Health & Family Welfare a manpower assessment an lo neih tawh, Report leh Recommendation te an thlirlet a, rawtna an siam thar bawk.

ARC hian an Report Volume 1 (Mizoram Houses & Streamlining of File Movement in Mizoram Secretariat) tih chu September mi 3, 2019 khan Chief Minister hnenah hian an lo thehlut tawh a. An report hi Cabinet meeting chuan pawmin tunah hian Chief Secretary hoin a tihhlawhtlin dan ngaihtuah mek a ni.

Administrative Reforms Committee hi Pu Lalngheta Sailo IPS (Rtd.) kaihhruaiin member pathum - Pu Nghaklianmawia, MCS Rtd., Pu Lalthansanga, MF&AS Rtd. leh Pi K. Vanlalrawni, MSS te an ni. ARC hian a term thla 10 chhungin vawi 62 meeting neiin, Department leh Official mi vawi 33 an meeting pui bawk.