Tukin zing khan International Women’s Day 2020 pualin Mahila Shakti Kendra, UD&PA Department, Kolasib leh MHIP Sub-Headquarters, Kolasib tangkawp buatsaihin Kolasib khaw chhung a veng hrang hrang a bawlhhlawh then fai hnatlang neih a ni a, Diakkawn YMA Hall ah Sawrkar hnuai a hmeichhia te dinhmun chawi sanna tur leh an chanvo humhalh sakna tur a hmalakna awm te ngaihthlak niin ‘Campaign on Environmental Conservation through Waste Management’ chungchang ngaihthlak a ni bawk.

Pu Timothy R Lalhmangaiha, District Urban Development Officer, Kolasib chuan Kolasib district a bawlhhlawh lak khawm thin te chu tangkai zawk leh ram leilung tan a hnawksak lo zawk a sawngbawl a nih theih nan sawrkarin hma chak tak a a lak mek thu a sawi a, bawlhlawh sawngbawlna kawng a bung thar kai tur hian Plastic Waste Management Rules leh Solid Waste Management rules te pawh hman mai tur a duan fel a nih tawh thu a sawi bawk a ni.

He hunah hian Mahila Shakti Kendra, Kolasib district atangin hmeichhiate hmasawn tur a infuih tharna Pi Zonunpuii’n a nei a, Mahila Shakti Kendra hnathawh dan leh hmalakna tlangpui a tarlang bawk a ni. Grace Lalrampari, District Coordinator, One Stop Centre, Kolasib pawhin thu sawiin Hmeichhia, chhan hrang hrang avang a tawm himna leh dinhmun insiamthat nana hun leh hmun mamawhte tan engtiklai pawhin One Stop Centre chu pan theih a nih thu a tarlang a, an harsatna kawng hrang hrang a pui turin mithiamte pawh rawn tur an awm thu a sawi bawk. Swadhar Greh kaltlangin hmeichhe kumtling tawh, chenna tur mumal neilo te tan Abigail Home ah enkawlna mumal tak nen, kum 5 thleng a awm theih thu Pi R Lalnunsangi, Superintendent, Swadhar Greh Home chuan a tarlang a, home an chhuah san hnu a an enzawn nana tangkai tur thiamna hrang hrang inzirtirna pek thin an nih thu a sawi bawk a ni.

Tukin hian bawlhhlawh chharkhawm hnatlang a thawk tha ber thlan niin Diakkawn branch MHIP ten lawmman pakhatna hi an la a, New Diakkawn ten pahnihna la in Kolasib veng 11 atangin MHIP member thahnem tak hnatlang tur hian an thawkchhuak a ni.