ASEAN (Association of Southeast Asian Nations) ram palaiten zan riaka Champhai leh Rihdil an tlawh hnuah vawiin chhun khan Khawzawl an rawn thleng a, Khawzawl Bawrhsap Pu H.Lianzela MCS leh district official ten Khawzawl Field No.1-a an mahni lo hmuahna tura buatsaihah an lo dawngsawng a, chaw chhun an kilho a ni.

ASEAN palaite lawmna inkhawm tawi buatsaih Addl DC Paul L.Khuma MCS,  kaihhruaiah Khawzawl Bawrhsap Pu H.Lianzela chuan, ASEAN Ambassador rual te’n Khawzawl an rawn tlawh chu lawmawm a tih thu a lo hrilh a. Khawzawl district chu district naupang tak, thla sarih vel chauha upa a nih thu te bakah Khawzawl district chanchin tlangpuite a sawi lang bawk a ni.

ASEAN Heads of Mission (HoM)  Chairman Pu Bouenneme Chouanghom, Laos Ambassador pawhin Khawzawl District Bawrhsap leh official dang ten tha taka an lo dawngsawng chu lawmawm a tih thu a sawi a ni.

ASEAN ram palaite lawmna inkhawmah hian malzai ngai thlak a nih bakah Chawngtlai Sahlam Cultural Club te'n hnam lam an entir a. Palaite leh an kawppuite hi district administration hmingin thil pek hlan an ni a, ASEAN palaite pawhin ngaihhruina thilpek an hlan let bawk a ni.         

ASEAN ram palaite hi an rawn thlen hlim hian Khawzawl field No-1, Mizo pa In sak te chu an mahni lo dawngsawng tura ruat ten an fan kualpui a, Mizo hnam zia rang langthei thil chi hrang hrangte entir an ni a, Khawzawl District Bawrhsap Pu H.Lianzela chawchhun buatsaih an kil zawh hian Khawzawl chhuansanin Aizawl lam an pan leh nghal a ni.

ASEAN ram palai Khawzawl rawn tlawhtute hi  ram panga ambassador-te niin, ASEAN HoM Chairman Pu Bouenneme Chouanghom, Laos; Pu Moe Kyaw Aung, Myanmar; Pu Ung Sean, Cambodia; Pu Sidharto Reza Suryodipuro, Indonesia; Pu Pham Sanh Chau, Vietnam leh an nupuite bakah Official dang anmahni rawn zuitute an ni.

Attachment

  • Loading attachment...