Vawiin khan Adolescence Education Programme(AEP) hmalak dan ngaituahtu, state chhunga committee sang ber, State Core Committee chu  Chairman Pi Esther Lalruatkimi, Commissioner/Secretary School Education kaihruainaiah Secretariat's Conference Hall, MINECO-ah an thu khawm a.  He hunah hian AEP hmachhawp  leh hmalakna kal mek te han  thar thawh leh  dan tur an sawiho a ni.

AEP hi kum 2005 atang khan sawrkar laipui Ministry of Human Resource Development leh National AIDS Control Organization (NACO) tangkawpin a din a ni a.  AEP thil tum ber chu  school naupang te zingah  HIV kaina kawng hrang hrangte chiang taka zirtir leh he natna hlauhawm tak laka invenna kawngte kawh hmuh.  Nundan hrisel leh nunphung thianghlim zawk zirtir te a ni a.  He programme hi High School leh Higher Secondary Education zirlai, Class IX & XI te zir tura duan a ni.

Meeting kaihruaitu Pi Esther Lalruatkimi, Chairman, State Core Committee's on AEP  chuan AEP hmalakna chungchang te leh 2014 atanga kumin inkar chhunga activity a tlem chhan te sawiin member in ruat belh a ni dan te pawh a sawi a. Hmalakna pawimawh tak a nih angin AEP hmalakna a tel department hrang hrangte chu thawhhona tha tak neih puiah a sawm a. Sum leh pai bakah a thawktu indaihlohna avangin he hmalakna pawimawh hi MSACS kutah chauh dah theih a ni lova, he programme huanga mawhphurhna latute zawng zawng thawhhona a pawimawh hle dawn  a ni a ti.

Vawiina  State Core Committee's on AEP  chuan Sikulah hlawkthlak taka AEP  zirtirnate kalpui theih dan tur, DIET AEP Team din chungchang, Training pe turte tha taka training paltlang hmasak tir chungchang leh AEP hmalakna endik leh ngun taka chhinchhiah dan tur te  a rel a.  Meeting hun hmasa lamah Dr Lalthlengliani, Project Director, MSACS, Member Secretary ni bawk hnen atangin AEP hmalakna hrang hrang te ngaihthlak a ni bawk a ni.