2384/2026-2027 

Lawngtlai, 26th September 2026: Vawiin khan Dr. Lorrain Lalpekliana Chinzah, Adviser to Chief Minister (H&FW, A&FW) leh Lawngtlai East bialtu MLA nibawk chuan Lairam Rescue Centre (LRC) leh District Jail Lawngtlai tan Table Tennis Board - pakhat ve ve a hlan a. Lawngtlai Bawrhsap Pu Donny Lalruatsanga chuan a tawiawm a ni. 

Dr. Lorrain Lalpekliana Chinzah chuan tangkai leh hlawk taka hman tura lawm taka TT Board- a hlan thu a sawi a. Rilru leh taksa hrisel nei turin insawizawi that a tul tak zet tiin, mahni hriselna ngaipawimawha theihtawpa insawizawi thin turin a chah a. Thlarau damna a pawimawh hmasa tiin, an thil tihsualah inchhira rilru thar pua khawtlang tana mi tangkai tak ni tura beidawng lova bei tlat turin a fuih a ni. Adviser to Chief Minister chuan Pathian hriat a pawimawh hmasa ber tiin, nun thar nei tur leh hmalam pan tura theihtawp chhuah chhunzawm turin a chah nghal bawk. 

Pu Donny Lalruatsanga chuan mihring tan insiam that theih reng a ni a, chutih rualin tumna tak tak neih erawh a tul hle a ti a. Mahni insiamthaa, hma lam huna mi tangkai tak ni turin duhsakna a hlan a ni. 

MLA leh Bawrhsap hi thawktuten an lo dawngsawng a. MLA thilpekah lawmthu sawiin, kawng engkima MLA leh Bawrhsap ten an ngaihtuah thinnaah lawmthu an sawi bawk a ni.