2385/2026-2027 

Dated Hnahthial, the 26th September, 2026: Vawiin khan Hnahthial District Volleyball Court-ah MLA Cup Inter Village Tournament kharna chu South Tuipui Assembly Constituency Bialtu MLA, Pu Jeje Lalpekhlua'n khuallian niin a hmanpui a; SDC, Pu Lawrence Lalhlanthara chuan khual zahawm niin a hmanpui bawk. Final hmeichhia inelnaah hian Hnahthial South-I VC team-te chu champion-in Mipa inelnaah hian Tuipui South VC team-te chu an champion a ni. 

Khuallian, Pu Jeje Lalpekhlua chuan Hnahthial District-ah infiammi an tam thu sawiin tournament huaihawt pawh a tam thu a sawi a. Chumi a nih rual chuan ram pum huapin infiamna lamah tun hman an phak tak loh thu sawiin achhan ni bera lang chu thangtharte'n mumal taka zirtirna an dawn tak loh vang a nih thu a sawi a. He tournament-a telte chu an hnu a lo kal leh zel turte tana sulsutu leh zirtirtu ni tura chahin thangtharte entawn tlaka nun hmang turin a chah bawk. Zuk leh hmuam bakah ei leh inah pawh insum tura chahin infiamna lama Hnahthial hmasawn zelna turin Empowering Mizoram Sports hnuaia coach chah luh theihna chu lo belchiang turin a chah a ni. 

MLA chuan tournament an khelhna hmun, Hnahthial District Volleyball Court chu semi-indoor a siam tum a nih thu sawiin chumi tihhlawhtlinna tur atan chuan hmalak mek a nih thu a sawi a. Tun dinhmunah chuan Pavillion sak thar a nih tawh thu sawiin Volleyball Court pawh chei that a nih thu a sawi bawk.  

Khual zahawm, Pu Lawrence Lalhlanthara chuan infiammi kan nih chuan ruihtheihthil lakah fihlim a tul thu sawiin kan lo chak a nih pawhin zu leh ruihtheihthil tel lova thianghlim taka lawm turin a chah a. Infiammi hlawhtling ni tur chuan chan ngam kan neih a tul thu sawiin chumi a nih loh chuan kan thlen theih chin kan thleng ngai dawn lo a ni a ti a. Sawrkarin thalaite tan ruahmanna tha tak tak a siam thu sawiin chherchhuah tlak leh duhsak loh theih loh zinga tel turin insumtheihna nen, mi tih bak piah lama pen theuh turin infiammite chu a chah a ni. 

Final hmeichhia inelnaah hian Hnahthial South-I VC team-te chuan an tumpui South Vanlaiphai VC Team-te chu set nga an khelh hnuah hnehin an champion a, mipa inelnaah hian Tuipui South VC Team-te chuan an tumpui Hnahthial South-I VC Team-te chu set li an khelh hnuah hnehin an champion bawk a ni.

Mimal lawmman hrang hrang sem nghal a niin lawmman dawngtute chu:

Mipa  : 

Best Spiker – Rohluzuala, Tuipui South

Best Blocker – Hruaitea, Hnahthial South-I 

Best Setter – Zidinga, Tuipui South

Best Receiver – Hruaia, Hnahthial South – I 

Hmeichhia : 

Best Spiker – Chhuangi, South Vanlaiphai

Best Setter – Nunpuii, South Vanlalphai

Best Receiver – Hruaii, Hnahthial South - I

Mimal lawmman dawngtute hian pawisa fai cheng sang khat (Rs. 1000) leh trophy an dawng a ni.