2383/2026-2027 

Kawnpui, 26th September, 2026: Vawiin khan Village Council-II, Kawnpui buatsaihin 'Lo Zawh Runpui' chu Pu J. Lalbiakmuana huan, Darnam-ah hlimtlang takin hman a ni. He hun hi Tuirial bialtu MLA Pu K. Laldawngliana chuan khuallian niin a hmanpui a, Kolasib Bawrhsap Pu H. Dolianbuaia chu khualzahawm (uaptu) a ni. Hunserh hi Pu Lalnunmawia, VCP chuan a kaihruai a ni.

Khuallian Pu K. Laldawngliana chuan thu sawiin, Village Council-II, Kawnpui ten hetiang Lo Zawh Runpui an buatsaih thei chu lawmawm a tih thu a sawi a. Amah chu huan leh rama kal tam lo tak ni mah se, loneitute harsatna tawn thinte chu a hriatthiampui em em thu sawiin, loneitu hna chu hna zahawm leh fak phu hliah hliah a nih thu a sawi. Hetiang hun hi kumin anga  duhawm leh hlawhtling hian kum dangah pawh chhunzawm zel tlak a nih thu a sawi a. "Hei hian tourism lamah pawh rahbi pawimawh tak a keng tel a. Ram pawn mi leh Zoram mipui tam zawkten he hmun hi an hriat a, mipui tam zawk a hip theih nana hma lak chhunzawm zel hi a tha hle a ni," a ti bawk.

He hun uaptu Bawrhsap Pu H. Dolianbuaia pawhin thu sawiin, Lo Zawh Runpui hmang tura hmunhma remchang leh tha tak an nei chu lawmawm a tih thu a sawi a. Kolasib District chu ram nuam leh tha tak a nih thu sawiin, a hmunhmate a tul anga hmang tangkai a, ram mawina leh a hlutnate mipui hmaa pho chhuah zel a pawimawh thu a sawi a. District hmasawnna turin sorkar pawhin theih tawp a chhuah zel a ni, a ti bawk. Tourism lama hma kan sawn theih nan kan hmun nuam leh tha neihte vawng thianghlim a, humhalh a, tihhmasawn zel tum turin kalkhawmte a chah a. Vawiin Lo Zawh Runpui hmang tura kalkhawm zawng zawngte chu hlim taka hun hmang ho theuh turin duhsakna a hlan nghal a ni.

Vawiin Kawnpuia lo zawhna hunah hian mipui thahnem tak leh Sawrkar Office thenkhat atanga aiawhte an tel a ni.