2689/2026-2027

Aizawl dated 15th October 2026: Ni 19, December 1989-a din, Mizoram Food & Allied Industries Coorporation (MIFCO) chuan vawiin chawhma khan I&PR Auditorium, Treasury Square, Aizawlah Lakhuihthei, Rawtuai leh Baibing dahthat rei theih tura a tin (Canned) a siam chu hralh chhuah theih turin phochhuahna hun a buatsaih a. Dr. KC Lalmalsawmzauva, Adviser to Chief Minister (Implementation of Handholding Scheme) chu Khuallian niin Pu Lalthazuala Rawite, Chairman, MIFCO Ltd. chuan huan a kaihruai a. MIFCO Ltd. Board of Directors-te, Pi Zosangzuali, CEO, MzSRLM, Pu C.Lalremliana, Chairman, MKVIB, Pu Jimmy Laltlanmawia, Chairman, Mizoram State Commission for Protection of Child Rights leh Pu JK Dawngzuala, Chairman, ZOHANDCO-ten an telpui a. Commerce & Industries Department, Planning & Programme Implementation Department aiawhte bakah MIFCO Ltd. a thawktute an tel a ni.

Khuallin Dr. KC Lalmalsawmzauva, Adviser to Chief Minister chuan hun rei tak ata dinhmun duhawm loh leh thawmthat mamawh tak dinhmuna awm thin, MIFCO Ltd. thawmthat a nih hnu a, kuthnathawktute thlai leh thei tharchhuah hmanga product chi 3 lai mai hralh theih tura phochhuah a ni chu lawmawm a tih thu a sawi a. He hmasawnna hian hruaitute inpekna leh thawktute thahnemngaihna a tilang chiang hle a ni, a ti.

Dr. KC Lalmalsawmzauva chuan hnathawhna kawng hrang hrangah chanvo felfai taka insem a pawimawh thu sawiin, thlai tharchhuaktute leh a sawngbawltute pawhin chanvo inkhawihpawlh lova, felfai taka chanvo insemna hian rah tha zawk leh hlawk zawk a hrin chhuah fo thu a sawi a. Mizorama thlai leh thei sawngbawlna atanga siam chhuah eitur tuihnai leh hrisel tak takte hi market lian zawka luhpui tur chuan consumer tana itawm tura tuam leh fun (Packaging design) mawi thiam a pawimawh hle thu a sawi.

Adviser to Chief Minister chuan kuthnathawktute kaltlanga hmasawnna kawng zawh tur hian, kan kuthnathawktute thar chhuah thlai leh thei te man man taka tih ralna tur market rintlak buatsaih hmasak a pawimawh thu a sawi a. Hmasawnna ziktluak thleng tur chuan Market rintlak chu kuthnathawktute kaltlangin ‘Production’ in a zui a ngaih thu a sawi a. Thlai leh thei tharchhuah kawngah chemical – lei tha hmang lova ‘Organic Farming’ uar taka kalpui zel a pawimawh thu a sawi bawk a ni.

Dr. KC Lalmalsawmzauva chuan ram leilung hausakna humhalh nan hmunhma nghet neia huan, lo, ram enkawl thiam tura inzirtir a pawimawh hle, tih a sawi a. Kuthnathawktuten ruahmanna thui tak nen hmun nghet neia huan leh lo an enkawl theih chuan, chung hmunhma tichangtlung tura inkalpawhna tha siam te, tui lakna tha siam te a awlsam zawk tur thu a sawi a. Sawrkar Flagship Scheme- Bana Kaih Scheme hnuaia thlai thlan bik panga lei chhunzawm zel turin sawrkar a inbuatsaih zel thu a sawi bawk a ni.

Vawiin MIFCO Ltd. thil siam hralh theih tura phochhuahna hunah hian Pu H.Lalrochama, General Manager, MIFCO Ltd. chuan report a pe a. MIFCO Ltd. Centre Chhingchhip chu kum 15 chhung eitur tin a sawngbawl (canned product) siam thei lova a awm hnuah, khawl engemawzah thawmthat nan Handholding Scheme atangin Cheng nuai 24 hman a nih thu leh kum 2026 chhung hian Baibing, Lakhuihthei leh Rawtuai tin 10,279 siam chhuah a nih tawh thu a sawi a. Pu Lalnunvula, Managing Director, MIFCO Ltd. chuan lawmthu sawina hun a hmang bawk a ni.