2687/2026-2027

Kolasib, 15th October, 2026: Vawiin khan District Agriculture Office Conference Hall-ah Agricultural Technology Management Agency (ATMA), Kolasib District buatsaihin 'Mahila Kisan Diwas, 2026' hman a ni a. He hun hi Kolasib Bawrhsap Pu H. Dolianbuaia chuan khuallian niin a hmanpui.

Khuallian Pu H. Dolianbuaia chuan thu sawiin, Mizo hmeichhiate chu hnam dangte anga thliar hran leh dinhmun chawikan chawp ngai lo deuhthawa kan awm thei chu lawmawm a tih thu a sawi a. Mizoram pumah Kolasib District anga agriculture atana ram tha a awm loh thu sawiin, "Hetiang ram tha kan neih hi a nihna anga hlawkpui tur chuan mipuiten theihtawp kan chhuah a, kan zir a ngai a ni," a ti.

Bawrhsap chuan, tualchhung kuthnathawktuten thlai leh thil dang an tharchhuahte a to deuh thin avangin thenawm state atanga thlai lo lut kan lei fo thin a, hei hian nasa takin kan ram economy a nghawng a, sum a pawt hekin hma kan sawn theih loh phah a ni, a ti a. "Hemi kawngah hian kuthnathawktute kan inenfiah a ngai hle a ni," tiin, hmasawn tur leh hmahruaitu ni zel turin kuthnathawktu hmeichhe kalkhawmte chu a fuih a ni.

He hun kaihruaitu Dr. Benjamin Lalduhawma, Project Director, ATMA, Kolasib chuan Mahila Kisan Diwas hman a nih chhan leh a thiltumte sawifiahin, agriculture chu eizawnna tling a nih theih nan leh ei leh barah kan hnianghnar theih nan Mizo hmeichhiate theihna leh thiamna tihhmasawn a tul thu a sawi bawk.

Vawiin hun hmannaah hian Pi Lalthawmmawii, President, MHIP Kolasib District chu khualzahawm niin thusawina hun a hmang a. Hemi bakah hian Pi Laltluanpuii, ADAO, Kolasib leh Pi Esther Zonunpuii, SMS (Plant Protection), KVK Kolasib ten kuthnathawktu kalkhawmte hnenah zirtirna pawimawh tak tak an pe nghal bawk a ni.