2686/2026-2027

Champhai, dated 15th October, 2026 : Vawiin khan North Eastern Council Secretary Pu Satinder Kumar Bhalla chuan Champhaia hmasawnna hnathawh hrang hrangte a hmunah tlawhin a enfiah a. Horticulture Department Secretary Pi Maria CT Zuali, Champhai Deputy Commissioner Pu Mohammad Aaquib leh Senior Research Officer Pi Lalnunsiami ten an tawiawm a ni.

Mualkawi Ginger USP Main Processing Hub bunna tur project site leh Zotlang Ginger Spoke Hub tur tlawh a tlawh hmasa a. Hub-ah hian sawhthing tihfaina, grade siamna, a chansawmna, pho rona leh pack-na tur khawlte bun a ni dawn a. Project hi tan thuai a nih theihna turin chin fel ngai la awm te chak zawk peih fel dan tur department changtute thu rawn a pe a, tualchhung sawhthing chingtute a kawm bawk a ni.

NEC fund hmanga siam mek Passion Fruit Processing Unit tlawhin, thawktute nen an inkawm a. He Processing Unit hi hawn a nih theih na tura hmabak la awmte zirchianga, chak leh zuala hma la turin a hrilh a. Sapthei tui quality tha siam chhuah a nih theih nan kawng engkimah fimkhur tura chahin, he Processing Unit enkawl tur leh thawktu tur mithiam zawn hmuh tum thuai turin a chah bawk a. NEC Secretary chuan khawl bun mai piah lamah Processing Unit chu hawn a nih hnuah tha taka sapthei tui siam chhuak thei tura enkawl zui a pawimawh thu a sawi.

Hemi hnu hian Tlangsam-a Champhai Winery tlawhin, a enkawltu Champhai Grape Growers’ Society hotute nen an inkawm a. Zu zawrh lama sawrkar policy inthlak thin avangin grape huan siamtute chuan harsatna an tawh thin thu leh tunah chuan he winery kaltlang hian huan neitute dinhmun pawh a ziaawm phah thu hrilh a ni a. Mizoram hi hmar-chhak state zingah grape winery nei awmchhun kan ni a. He winery-ah hian ni khatah grape wine case 150 siam chhuah a ni a, ni khata siam chhuah theih tam ber case 600 siam chhuak theih dan turte a sawipui a. Grape wine quality tha tak siama, kuthnathawkte eizawnna tihchangtlun lehzual a nih theih nan tan la zel turin a chah.

NEC Secretary chuan Sericulture Department hnuaia Oak Tasar Seed Farm a tlawh leh a, dept hotuten an hnathawh dan leh pangang atanga silk la zai siam chhuah a nih dan te an hrilhfiah a. Champhai chu Mizorama silk chi li (4) – oak tasar, mulberry, muga leh eri siam chhuak thei awmchhun a nih thu hrilh a ni a. Pangang khawituten man tha zawka an la zai siamte an hralh chhuah theih a ngaih pawimawh thu a sawi. Hemi hnu hian NEC Secretary chuan Zokhawthar tlawhin, Land Custom Station hotute nen an inkawm.