1870/2026-2027

Dated Aizawl, the 20th August 2026: Vawiin khan Adviser to Chief Minister (Finance & Planning) leh bialtu MLA ni bawk Pu TBC Lalvenchhunga chuan Sakawrtuichhun panna kawng, Ramrikawn—Zihnghalkawn inkar kawng siam mek chu a hmunah kalin a endik.

Amah lo dawngsawngtu khawtlang hruaitute kawmin Pu TBC Lalvenchhunga chuan kawng siam mek leh fur innangching avanga mipuiin harsatna an tawh mek chu sawrkarin a hriatpui tih a sawi a, khawtlang mipuite mamawh hre reng chungin sawrkarin ngawrh taka kawng siamthat hna a kalpui zel thu a sawi bawk.

Pu TBC Lalvenchhunga chuan Ramrikawn—Zihnghalkawn kawng chu double lane-a siamna tur Central Road Fund sawrkar hmasa te hunah hmuh a nih tawh thu sawiin, land acquisition tihfel theih loha a awm reng avangin hun rei tak kawng siamthat chu tihpuitlin a ni lo, a ti a. Sawrkarin nasa taka a bawhzui hnua kawng siamthat hna tan thei a ni ta chu lawmawm a tih thu a sawi a. Kawng pavement siamna atan Ministry lamin funding an sanction tel loh avang leh land acquisition thenkhat tihfel ngai a la awm avangin duh angin kawng siam hna thawh a chak theih loh thu a sawi bawk.

He kawng siam mek chungchangah hian "Joint Action Committee on Sakawrtuichhun Road" te chuan thuneitute hnenah lehkha an thlen tawh thu sawiin, khawtlang hruaitute nen an inbiak fo thu leh a line department leh central ministry lamah pavement siamna atan chak taka funding bawhzui mek a nih thu a sawi bawk.

Pu TBC Lalvenchhunga hi PWD engineer te, Aizawl DC official te, Revenue Dept hnuaia Surveyor te leh khawtlang hruaituten an tawiawm a ni.