2456/2026-2027 

Aizawl, ni 1 October, 2026: Vawiin chawhma dar 9:30 khan Vanapa Hall-ah Govt. Aizawl North College (GANC) chuan an 37th Annual College Week Closing Function an hmang a. Adviser to CM (Finance) Pu TBC Lalvenchhunga chu khuallian a ni.

Khuallian Pu TBC Lalvenchhunga chuan zirlaite chu khawvel hmachhawn ngam tura inbuatsaih lawk turin a fuih a. Classroom chhunga an thil zir chauh duhtawk lova, mahnia inhaikuak dan tur zawng tel zel turin a chah. Chief Guest chuan Mizo te chu thil chi hrang hrang thiam, talent nei ṭha, thiam bik  erawh nei lo (jack of all trades, master of none) kan nihna atangin hma kan sawn a ngai tawh a, a ti a. Tunah chuan eizawnna tlak kan tuina zawn chhuah a, chu chu kan bawh chat a tul tawh a ni, a ti.

Pu TBC Lalvenchhunga chuan kum 10 hnua an dinhmun tur ngaihtuah chungin an tun hun hmang ṭha turin zirlaite a chah a. Zirlai an nih angin Mizoram dung leh vang, mihring chengte leh an eizawnna te thlengin, leh kan ram resource te uluk taka zirchiang turin a ngen bawk. Zirlaite chu hlawhtlinna an chan hunah mahni tan chauh ni lo, khawtlang tana mi ṭangkai ni tel bawk tur leh, Mizoram tana hmasawnna thlentu ni turin a fuih a. Closing Function programme chu hlim taka hmang turin duhsakna a hlan a ni.

Principal Dr. Saroj Laldinpuii chuan an college dinhmun tlangpui sawiin tunah hian Academic Department 7 an nei a; College-ah zirlai 965 leh zirtirtu 55 awmin, an vaiin mi 1020 an awm mek thu leh, kum 2024 khan NAAC Accredited 'B' Grade College an nih thu a sawi a ni. 

GANC Best Girl leh Best Boy award pek sem a ni a. Andrew Liansangkima, Games & Sports Secretary chuan report pe in, lawmman semna a nei nghal a. Hnam leh zai te thlirho leh ngaihthlak a ni a. PC Lalhruaitluanga, General Secretary chuan lawmthu sawina in Session hmasa ber hi a khar a ni.