159/2025-2026

Aizawl, the 12th April 2025: Nimin chawhnu lam khan Adviser to CM (Finance & Planning) Pu TBC Lalvenchhunga chuan Junior Engineer Service Association of Mizoram(JESAM) General Conference vawi 7-na ah khuallian niin hun a hmanpui a. General Conference hi Multipurpose Hall, Berawtlang ah nghah a ni.

Adviser to CM chuan a tawnhriat neih atangin JE te chu an dinhmun leh hnathawhte a hriatthiam pui thu a sawi a. A hmuna a tak taka hna thawktu an nih thu leh harsatna a lo awm changa dem hmasak an hlawh thin thu te thlenga a hriatpui thu a hrilh.

Mizoram sawrkar hnathawkte zinga Service rivalry awm nasain hnathawhna boruak a tichhia nia a hriat thu pawh a sawi a. Works hnathawh hrim hrimah kalphung siamthat ngai tam tak a la awm ni a hmuh thu a sawi a ni. 

Pu TBC Lalvenchhunga chuan JE te chu inzir zel a, thil thar lo chhuak apiang lo hriat ve zel a that thu hrilhin, eirukna laka fihlim chu mimal taka a thil ngaih pawimawh ber pawl a nih thu leh chu mi kawngah chuan sawrkar thawhpui tlat turin kalkhawm te chu a sawm a ni.

Laltlanmawia Renthlei, Association President-in palaite lawmna thu a sawi a. An General Secretary Pu C Lalrosang an Report a pe bawk thung.

JESAM hi kum 2015 ah din niin an member-ah hian Junior Engineer, Diploma and Non-Diploma, B.E leh M.E te thlengin an a awm a. Works department hrang hrang PWD, P&E, PHE, Irrigation leh Department hrang hrangah an awm hlawm. Other Departments tiam loin sanctioned post 733 an nei a. Service lai hi 520 an ni.