1938/2024-2025

New Delhi, 6th September 2024: Adviser to Chief Minister (Technical) Er. H. Ginzalala chuan September ni 3-6 chhung hian Delhi tlawhin, sawrkar laipui hotu hrang hrang – Pu Nitin Gadkari, Minister, Road Transport & Highways; Pu Sarbananda Sonawal, Minister, Ports, Shipping and Waterways; Dr. Himanshu Pathak, Secretary DARE & Director General ICAR; Pu Vijay Kumar, Chairman, IWAI leh Ministry hotu dangte a kawm a, Mizoram mamawh hrang hrang a sawipui.

Champhai North bialtu ni bawk Er. H. Ginzalala hian sawrkar laipui hotute hnenah hian Lunglei, Champhai leh Saitual District-a Krishi Vigyan Kendra (KVK) dah belh thuai dan tur te, Helicopter Service changtlung zawk Mizoramin a neih theih dan tur te, NH-06 Champhai Khankawn- Kanan kawngpui chungchang te leh Mizoram chhunga lui inkalpawhna (Inland Waterways) chungchang te a thlen a. Sawrkar Laipui hotute nen hian inkawmna hun tha tak neiin, theihtawp an lo chhuah pui tur thu an lo chah hlawm a ni.

Er. H. Ginzalala hian Chief Minister Pu Lalduhoma’n Helicopter Service changtlung leh tam zawk Mizoramin a neih theih nana hma a lo lak tawhna te chu bawhzuiin Ministry of Home Affairs leh Civil Aviation hotute a kawm a. Ministry of Home Affairs hotute hian Helicopter Service awm sa bakah a dang pakhat pek belh an tum thu an lo hrilh a, Mizoram sawrkarin lehkha tihfel ngai tlem a tihfel hunah Tender theih nghal a ni dawn tih an lo hrilh bawk a ni.

Ministry of Road Transport & Highways changtu Minister Pu Nitin Gadkari hnenah hian Er. H Ginzalala chuan Champhai Khankawn atanga Champhai Kanan kawngpui chungchangte leh Mizoram chhunga NHIDCL hmalakna hrang hrang te a sawipui a. Minister chuan Mizoramin kawngpui tha zawk a neih theih nan theihtawp an chhuah zel tur thu a lo hrilh a ni.

Adviser to CM hian Ministry of Ports, Shipping and Waterways changtu Minister Pu Sarbananda Sonowal leh Pu Vijay Kumar, Chairman, Inland Waterways Authority of India (IWAI) pawh kawmin Mizoram chhunga lui inkalpawhna tura hmachhawp a neih te a sawipui a. Ministry lam hian tha taka lo dawngsawngin, uluk taka ngaihtuah chhunzawm an tum thu an lo hrilh a ni. Er. H. Ginzalala chuan Ministry hotute hnena a thu thlen hi ruahman chhinna (concept) chauh a nih thu sawiin, leilung a nghawng dan (Environmental Impact) bakah Technical feasibility leh Economic viability te la zir chian a, Chief Minister hova la thlirho a tul tur thu a sawi bawk a ni.

Lunglei, Champhai leh Saitual District-a KVK din tura hmalakna kal mek pawh Adviser to Chief Minister hian a bawhzui a. He mi chungchangah hian Dr. Himanshu Pathak, Secretary, Department of Agricultural Research & Education (DARE), Indian Council of Agriculture Research (ICAR) Director General ni bawk chu kawmin, District pathuma KVK din thuai a nih theih nan hma an lak tur thu an lo hrilh a ni.

Er. H. Ginzalala hi Pu James Lalrinchhana, Joint Secretary, GAD/ DC&MA , State Nodal Officer Pradhan Mantri Jan Vikas Karyakram (PMJVK) ni bawk chuan a tawiawm a ni.