1937/2024-2025

Dated Hnahthial the 6th September, 2024: Vawiin District Fisheries Development Office-ah Hnahthial District chhunga Sangha dil siam (new rearing pond) leh a chi siam (hatchery) tanpuina Pradhan Mantri Matsya Sampada Yojana (PMMSY) dawngtute koh khawm niin hmalak dan tur inhrilhfiahna hun hman a ni a, sangha dil thar siam tanpuina dawngtu te bank account-ah Rs. 75,600 a chi siam tanpuina dawngtu hnenah Rs. 10,74,050 thun sak nghal a ni.

He hun hi Pu George Lalnuntluanga, District Fisheries Development Officer (DFDO) chuan kaihruaiin Sangha dil laih dan tur chipchiar takin a sawifiah a, tanpuina dawngtute chu theih tawp chhuah a hlawhtlinpui ngei turin a chah a, uluk taka department lam chuan an vil tur thu te, Bawrhsap hova District Level PMMSY Committee meeting phei chuan a hlawhtlin ngei theih nan a endik tur hian Sub Headquarters YMA te ngen nise a tih thu te a sawi a, district thar kan ni a, district dangte entawn tlaka hna kan thawh hi sorkar, department leh District Level Committee te chuan kan duh ber a ni a, Sangha hlawk taka thar a, chhungkaw intodelh nana hmang theuh turin duhsakna a hlan nghal a ni.

Tun tuna PMMSY hnuaia Sangha dil siam tanpuina dawngtute hi mi 25 niin hatchery dawngtu mi pakhat a awm bawk a, vawiina tanpuina an pek chhuah hi Rs. 29,64,050 a ni a, hei bakah kum hmasa lama la pek kim loh state matching share engemaw zat an sem chhuak bawk a ni.