1939/2024-2025

Saitual, the 6th September, 2024: Vawiin chawhma dar 10: 30 am khan Saitual Bawrhsap Dr. Lalngura Tlau kaihhruainain DC Conference room Saitualah District Level Steering Committee on Swachhata Hi Seva 2024 chu a vawikhatna atan an thu khawm.  

Thutkhawm kaihruaitu Saitual Bawrhsap chuan Swachhata Hi Seva 2024 thil tum tlangpuite a tarlang a, kumin thupui- ‘Swabhav Swachhata - Sanskaar Swachhata' chu sawifiahin, faina chu mitin nunphunga bet tlat tur a ni, a ti. Kumtina ‘Faina Hapta’ ram chhunga hman thin chu tawp zui mai loa kan nunpui chhunzawm a tul tih a sawi a, ram changkang apiangin faina an ngai pawimawh a, hemi kawngah a tulna apianga hma lak zel a pawimawh tih a sawi.

Nodal Officer (Urban) Pu Albert Vanlalliantluanga, District Urban Development Officer chuan Swachhata Hi Seva Campaign kum hmasa lama an thupuite leh an lo kalpui thin dante a tarlang a, Swachhata Hi Seva 2024 hian banpui pathum pawimawh tak a nei a, chungte chu-  Swachhata Ki Bhagidaari ( Faina kawnga mipui mimir telna leh hrilhhriatna), Sampoorna Swachhata (hun bik tuk neia vantlang hmun harsa leh bal zual lai tihfaina) leh Safaimitra Suraksha Shiviris- (faina kawnga hmalatute hriselna endik) te an ni tih a sawi. Pu Albert Vanlalliantluanga chuan campaign hnuaia tihtur hrang hrangte sawiin, sum fai dawn zat turte leh a hmanna turte a tarlang bawk a ni.  

Nodal officer (Rural) Pu Lalzuala, SDO PHED chuan he campaign-a activity hrang hrang kalpui dan tur leh SHS kaihhruaina te a tarlang a. Pi Dorothy Muansangi, Sub-Divisional Officer (C), Ngopa leh Pu J. Lalhmahruaia hmar, Block Development Officer, Phullen te chuan an Block theuha hma an lak dan turte an sawi bawk a ni.

He thutkhawmah hian District chhungah hmun bal zual (black spot) zawn chhuah a, tihfai hnatlang neih tur chungchang sawi hoin, Village Council kuta dah rel a ni a. Special Gram Sabha Awareness programme chu khaw tina neih tura rel niin,  office leh zirna inahte Swachhata thutiam (pledge) neih rawt bawk a ni. Zirna in, office hmunhma, khawtlang hmun pawimawhte leh dawr leh a chhehvelte tihfai hnatlang rawt a ni a, faina kawnga intihsiakna- essay inziahsiak te huaihawt ni se tih rel a ni bawk. Heng activity hrang hrangte hi thla lak a, IT portal leh social media ah te upload tur a ni a, SHS2024 Campaign hashtags- #SwabhavSwachhata #SanskaarSwachhata #SwachhataHiSeva2024 hmang uar turin an rel nghal bawk a ni. 

Swachhata Hi Seva Campaign 2024 hi September ni 14 atanga October ni 1 thleng kalpui tura rua hman a ni a, hmun bal zual (black spot) zawn chhuah hun chu ni September ni 10 atanga tan a ni ang. Swachh Bharat Diwas Celebration chu District Headquarter-ah October ni 2 ah hian neih a ni ang. Committee Chairman District Bawrhsap, Nodal Officer Rural leh Urban-te bakah Committee member-te he hunah hian an tel a ni.