1940/2024-2025

Aizawl, the 6th September, 2024: Aizawl khawpui chhung Zone-7 huamchhung veng 11 a ek leh zun thli mumal taka sawngbawlna tur project 'Small Bore Sewerage & Septage Treatment for Aizawl Zone -7' kalpui tur khuhhawnna chu vawiin chawhma dar 11:00 khan PHE leh UD&PA Department tangkawp buatsaihin Taxation Auditorium, MINECO ah neih a ni a. He hunah hian Urban Development & Poverty Alleviation (UD&PA) Minister Pu K. Sapdanga chu khuallian a ni a, Public Health Engineering (PHE) Minister Prof. Lalnilawma chu khualzahawm a ni. 

Khuallian UD&PA Minister Pu K. Sapdanga chuan Small Bore Sewerage & Septage Treatment for Aizawl Zone -7 chu project pawimawh tak, hriselna khawih leh chona nasa tak kengtel a nih thu sawiin, project phurawm tak a nih avangin a thatna leh a tumte mipui hnena puanzar kawngah tanlak pawh a tul hle dawn a ni, a ti a. Sawrkar hmalakna project lian leh pawimawh tak takte mipuite zirtir leh hrilhhriat kawngah tun aia tanlak lehzual a pawimawh thu sawiin, Sawrkar hotute chu a puanzar lam ngaipawimawh deuh deuh turin a chah a. Project kalpuina tur Aizawl west area-te vannei a tih thu sawiin, "Nitin khawsak leh nunna atana tangkai, dam chen khawih thil a nih avangin a phurawm a, a hlawhtlin theih nan pawh kan thawhho thiam a ngai dawn a ni," a ti a. Zun leh ek thlite a lo thianghlim a, thianghlim leh hrisela chhuah leh theihna tura tanlak chu ngaihpawimawha neih a tul thu sawiin, project kalpui tur chu tha tak, a nihna ang taka hun ruat chhung ngeia zawh hman tum turin a chah a. A huamchhunga awmte'n tangkai taka an hman theih nan duhsakna a hlan a ni. 

Khualzahawm PHE Minister Prof. Lalnilawma chuan project khuhhawn tak chu PHE Department kaltlanga Sewerage & Septage project kalpui hmasak ber tur leh mipui vangtlang hriselna tura duan a nih thu sawiin, "Hei hi a huamchhung Aizawl tlak lam vengte thli bawlhhlawh sawngbawlna leh Aizawl tuilakna tihthianghlimna, tui hrisel petu tur a ni," a ti a. Project kalpui tur chu thil chhia leh tangkai tawh lova langte tangkai zawka hman theih tura sawngbawlna, 'waste to wealth' ataka kalpuina tur a nih thu a sawi a. Department project bik a nih loh thu leh a hlawkna teltu tur khawtlang mipuite ta a nih thu sawiin, a huamchhung vengte chu a bulthum atanga neitu thinlung pu chunga tawiawma vil pui turin a sawm a ni. 

Vawiin hun hman hi Er. F. Liantluanga, Secretary, PHE Department chuan kaihruaiin Er. Lalrothanga, Engineer-in-Chief, PHE Department-in project chanchin tlangpui a sawifiah a. UD&PA Secretary Pu Lalmalsawma Pachuau hnen atangin thusawi ngaihthlak a ni a, Er. Zodinthari, Chief Engineer, Zone-I in lawmthu sawiin hun hman a khar a ni. 

He hunah hian Minister of State & Aizawl West-II bialtu MLA Pu Lalnghinglova Hmar; Adviser to CM (Finance & Planning) & Aizawl West-I bialtu MLA Pu TBC. Lalvenchhunga; Aizawl West-Ill bialtu MLA Pu VL. Zaithanzama; Ward-XIV Corporator Pi Ramthanzauvi; Aizawl DC Er. Lalhriatpuia; UD&PA Director Dr. Andrew H. Vanlaldika; PHE leh UD&PA Department Official dangte bakah project kalpuina tur veng hrang hranga khawtlang hruaitute an tel a ni. 

Master Plan for Aizawl Vision -2030 siamah Aizawl khawpui chu Zone 9 ah then niin, Zone-6 ah he project hi SIPMIU in an kalpui tawh a. Tunah hian Zone-7 hnuaia Local Council 11 (Dawrpui, Chawnpui, Tuikual North, Tuikual South, Dinthar, Dawrpul Vengthar, Vaivakawn, Kanan, Khatla, Mission veng, Zarkawt) ahte kalpui tur niin, NGT zirchiannaah Aizawl tuilakna, Tlawng lui pawhtu Tuikual lui leh a pawhtu luikawrte tih thianghlim a tul avangin hmalak lehna hmasa atan Zone-7 hi thlan a ni. 

He huna tarlan a nih dan chuan UD&PA hnuaia AMRUT 2.0 Scheme kaltlangin PHE in water supply leh sanitation atan cheng vaibelchhe 145 vel a hmu a. Heng zinga cheng vaibelchhe 105.86 hi khaw 19 a tuilakna atana ruahman niin thawh chhoh mek a ni a, cheng vaibelchhe 39 chu sanitation atan ruahman a ni a, first installment cheng vaibelchhe 29 dawn tawh a ni. Small Bore Sewerage & Septage Treatment for Aizawl Zone -7 project hi cheng vaibelchhe 38 bawr vel senga thawh tum niin, kum 2 chhunga zawhfel tum a ni a, Company-in a enkawl hna kum 3 chhung an thawk zui ang. 

Hemi hnu hian Chief Engineer, Zone-I kaihhruaiin project chungchang Zone 7 huamchhung veng hrang hrang Local Council, YMA, MHIP, MUP leh khawtlang mipuite hrilhhriatna leh inrawnkhawmna neih a ni.