Vawiin khan World Health Organisation, Ministry of Health & Family Welfare leh Mizoram Sawrkar bultumin State Adverse Event Following Immunization (AEFI) Surveillance Workshop neih a ni a.  Hridanna pek hnua engemaw, ngaihthatlohna lo awm palha hmalak dan turte zirho a ni. 

Khawvela vaccine hman 70% hi India rama siam leh sem chhuah a ni a, a him em em rualin enge maw vangin harsatna a thleng ve thei a. Vaccine nena inkaih hnawih miah lo, mahse ngaihbel theih tura thil thleng a awm thin bawk avangin hetiang AEFI hi report a awm phawt chuan enfiah zel an ni. AEFI Surveillance in a tum ber chu vaccine pekte a nih dan tur  taka hna an thawh nan leh a dawngtu tana harsatna siam lo thei ang bera pek an ni em tih vilna a ni a. Engemaw zawhna leh ngaihthatlohna a lo awm pawha zirchiang thuaia, vaccine dawngtu leh a petute ngaihngam taka an awm theih nan AEFI Surveillance Workshop hi neih a ni.

 He Workshop ah hian khuallian Dr Lalrozama, IAS, NHM Mission Director chuan Hridanna lak a pawimawhzia a sawi nawn leh a. Harsatna hrang hrang hnuaia Health Staff ten hridanna a bi kima an pe zel thin chu lawmthu a hrilh rualin, thingtlang hmun harsa lehzual, eizawng tura nitin feh chhuak thin te chu Health Department-a thawktute zawkin an pan zawk hram hram an ngai a ni, a ti.

Workshop ah hian Resource person panga  Dr Vineet Goyal,  Dr Subhajit Bhattacharjee, WHO atangin Dr Lalhlimpuii, Ministry of Health and Family Welfare atangin Dr B Lalrambuatsaiha leh Dr Lalzawmi, State EPI Officer ten kalkhawmte an zirtir a ni.