Vawiin khan ATI Auditorium-ah Mizoram sawrkar hnuaia mipuite hnena service sawrkarin a pek thin hunbi neia pek chhuah ngei ngeina dan Mizoram Right to Public Services Act, 2015 Awareness Campaign hawnna hun neih a ni a. H&FW Commissioner & Secretary Pu Lalrinliana Fanai chu Khuallian a ni.

Khuallian Pu Lalrinliana Fanai chuan December Ni 1, 2015 khan Mizoram Right to Public Services Act, 2015 hi hman tan a ni tiin he dan hian a tum ber chu sawrkar service pekchhuah theihte hunbi tiam chhunga a diltu hnena pek a ni, a ti a. Tun dinhmunah hian department paruk (6) hnuaiah service 46 awmin sawrkar chuan service dahbelh zel a tum a ni, a ti a. Mipuite hnena service pekchhuah tullova tihkhawtlai awm thin venna dan a ni tiin mipuite mamawh ngaihtuah zung zung sawrkar kan neih theih nana ruahman a ni, a ti a. India ramah hetiang dan hi state hrang hrang 18 ah hman mek a nih thu a tarlang a. Hmangtu mipuiten an hman tangkai ang zelin he dan hi a hlu zual dawn a ni, a ti a. Tun dinhmunah chuan mipuiten kan hman tangkai tur angin kan la hmang lova, hemi avang hian Mizoram pumah inhrilhriatna beihpui neih a ni dawn a, district, sub-division leh RD block-ah August thla chhungin kalpui a ni dawn a ni, a ti. Department-a officer leh hnathawkte a hnuai ber atanga a chung ber thlengin mipui hamthat nan thahnemngai taka kan thawhho a ngai a ni, a ti.

Mizoram Right to Public Services Act, 2015 hian sawrkar department hrang hrang Food, Civil Supplies & Consumer Affairs, Rural Development Department, Taxation Department, Public Health Engineering Department (PHED), Social Welfare leh Finance Department te a huam a. Service 46 awmin service thenkhat chu ration card pekchhuah te, MGNREGA hnuaia job card sem chhuah te, driving licence siam te, learner’s licence pekchhuah te, tui supply connection te, adoption certificate siam te an ni a. Form hranpa a nei lova, Department ten dilna an pawm thin pangngai ang tho a dil tur a ni.

Mizoram Right to Public Services Act, 2015 in a huam department tinah mawhphurtu tur Designated Officer ruat an ni a, thubuai awm palha lungawi lohna thlenna tur First Appellate Authority leh Second Appellate Authority ruat tel an ni. Designated Officer-te hian mipuite hnena sawrkar mawhphurhna (notified services) diltu hnenah hun tiam chhunga a pek loh chuan First Appellate Authority-in nitin Rs 250 a chawitir thei a, Rs. 5000 thleng chawitir theih an ni. Designated Officer ten mipuite hnena sawrkar mawhphurhna a diltu hnena chhan leh vang mumal tak awm lovin a pe chhuak lo a nih chuan Rs. 500 aia tlem lo, Rs. 5000 aia tam lo chawitir theih a ni. Service diltu dilna hi hnawlsak a nih chuan a dilna hnawl atanga ni 30 ral hmain dilna siamtu in First Appellate Authority hnenah lungawi lohna a theh lut thei a. First Appelate Authority thu tluknaah lungawi lohna a awm a nih chuan Second Appellate Authority-ah First Appellate Authority thu tlukna siam atanga ni 30 ral hmain lungawi lohna a thlen theih a ni.

Programme hi ATI Deputy Director (Training) Pu K. Lalhmangaihzuala chuan kaihruaiin kalkhawmte lawmna thu a sawi a. DP&AR (GSW) Under Secretary leh Nodal Officer ni bawk Pu Lalrohlua’n lawmthu sawina in hun a khar a. I & PR Director leh hnathawkte, ATI, ICT, MUP, MHIP, MJA, Local Council aiawhte an tel a.   ATI Asst. Director Pu K. Lalkrosschuanga kaihruaiin training neih chhunzawm nghal a ni.