614/2023-2024
Lunglei the 29th May, 2023 – Pu Donny Lalruatsanga, District Magistrate, Lunglei chuan 25th May 2023 khan a hnuai ami ang hian African Swine Fever (ASF) chungchangah thuchhuah a siam.
Tunlai hian African Swine Fever (ASF) hri chu Mizoram District thenkhatah a leng leh mek niin hriat a ni a, he vawk hri leng avanga mipuiten harsatna kan tawh theihte chhawk zangkhai a nih theih nan Lunglei District chhunga ASF avanga inkhuahkhirhna hman mekte tihdanglamna thupek chhuah a tul a.
Chuvangin kei, Donny Lalruatsanga, District Magistrate, Lunglei District hian Section 144 of CrPC 1973 in thuneihna min pek angin a hnuaia ami ang hian thupek ka chhuah e:-
1. Lunglei District chhungah ram dang leh state dang atangin vawk leh vawksa rep lakluh khap tlat a ni.
2. ASF len lohna state-a APEDA in a pawmpui farm atangin vawksa atanga siam (frozen pork) lak phal a ni. Amaherawhchu, SOP zawm chungin Director, AH&Vety Department phalna lak hmasak tur a ni.
3. Lunglei District huamchhungah ASF hrilen lohna khua/vengte inkarah chauh vawk leh vawksa inlak tawn theih a ni.
4. ASF hri avanga 'Infected Area-a' puan tawhnaah ASF avanga vawk thi thla 1 (khat) chhung a awm tawh loh chuan vawk talh leh a sa zawrh phal a ni ang.
5. ASF avanga vawk thite awmna in/hmun/farm ngun taka disinfectant hmanga sawngbawla tihfai tawhna hmun chu thla 3 (thum) ral hnuah vawk dah luh theih a ni.
6. Vawk tana hri hlauhawm a len mai loh nan vantlang kawng leh ram hrulah vawk talh leh sawngbawl phal a ni lo.
7. Chhan leh vang hriatloh avanga vawk thi reng reng VC/YMA kaltlangin AH & Vety Department hotute hnenah thlen/hriattir vat thin tur a ni a, chutianga thi reng reng chu paih mai lovin chinai nen thuk taka phum tur a ni.
He thupek hian chhuah a nih atanga ni 60 (sawmruk) chhung a huam anga.
He thupek zawm lote chu IPC Section 188 hmangin hrem theih an ni ang.
He thupek hi vawiin May ni 25, 2023 hian District Magistrate seal-a nemnghetin ka hming ka ziah hnan e.
