613/2023-2024

Aizawl the 29th May 2023: Deputy Chief Minister Pu Tawnluia chuan vawiin khan Millenium Centre Atrium-ah Tourist Guidance Information Kiosk leh Sanitary Napkin Vending Machine te hawngin mipui leh a mamawh apiangten tangkai taka an hman atan a hlan nghal a ni.

Deputy Chief Minister chuan khualzin miten Mizoram chungchang hrilhhriatna, khualzinmite tana tangkai leh bengvarthlak tak, an veivahna leh hawiharh nan leh khawchhunga hotel leh hmun pawimawh hriattirna 'Information Kiosk' hawn theih a nih chu hmasawnna ropui tak a ni a ti a. Hmeichhiate tana awlsam zawk leh an mamawh huna hman mai tur Sanitary Napkin Vending Machine mipuite hnena hlan a ni bawk chu lawmawm a tih thu sawiin, a bultumtu UD&PA Department hnuaia Smart City bakah Tourism Department-te chu fakawm a tih hle thu a sawi a ni.

Pu Tawnluia chuan UD&PA Department chu fakin khawpui changkanna ngaihtuahtu an nih rualin mi rethei leh harsa zawkte khaichhuahna leh an hmasawnna ngaihtuah thin an ni a ti a. Smart city hnuaiah project hrang hrang 30 chuang thawh mek a nih thu tarlangin Aizawl khawpui hmasawnna kawngah an thawk nasa hle a ni a ti.

Deputy Chief Minister chuan ramchhung leh pawn atanga khualzin veivak ten information an mamawhte pholanna Kiosk chu Aizawl khawpui laili-a hmun pawimawhah te bakah Lengpui Airport-ah bun a ni dawn a ti a. Kiosk atang hian khualzin miten Mizoram chungchang an hriat duhte an hre zung zung thei tawh dawn a ni a ti. Hmeichhiate tan a tul huna an mamawh an lam theihna tur Sanitary Napkin Vending Machine pawh sikul hrang hrang bakah Aizawl khawpui hmun thenkhat-ah dah mek a nih thu a sawi. Hetih rual hian Pu Tawnluia chuan mipui vantlang hmasawnna tura khawl bunte hi dimdawi thiam tur leh neitu rilru pu a humhalh tlat turin kalkhawm mipuite a chah a ni.

Vawiin programme-ah hian Aizawl Smart City Limited Chief Executive Officer Pu C.C. Lalchhuagkima chuan khuhhawnna thu a sawi a, Tourism Director Pu Saitluanga’n thusawi tawi neiin Kiosk leh Sanitary Napkin Vending Machine demonstration video thlir ho nghal a ni a, Pu V. Lalruatliana, Deputy Chief Executive Officer, Aizawl Smart City Limited in lawmthu sawiin hun a khar a ni.