DIRECTORATE OF INFORMATION & PUBLIC RELATIONS, Government of Mizoram, India

612/2023-2024

27.05.2023: Chief Minister Pu Zoramthanga chuan vawiin khan NITI Aayog Governing Council meeting, New Convention Centre, Pragati Maidan, New Delhi a buatsaih chu telin Mizoram mamawhte a thlen. He meeting hi Prime Minister Pu Narendra Modi, NITI Aayog chairman ni bawk chuan a kaihruai a; Chief Minister hi Mizoram Chief Secretary Dr. Renu Sharma in a tawiawm a. Kumin Governing Council meeting thupui chu 'Viksit Bharat @2047: Role of Team India' tih a ni.

Chief Minister Pu Zoramthanga chuan Sustainable Development Goals Index 3.0 ranking chhuah hnuhnun berah state hma la tha 15 zingah Mizoram chu 12-na a nih thu tarlangin, Mizoram chu SDG hlawhtlinna tehna atana Local Indicator framework hmanga village legal local level a hma la hmasa ber state-te zing ami a nih thu a sawi a. Hemi kaihhnawihah hian Ngopa Village Council chu an thawh that avangin best Gram Panchayat Award in 2023 pek a nih thu a sawi.

Mipui hmathatna turin leh a bik takin mahni kutkawih a eizawngte puih a tihhmasawn nan state flagship programme SEDP kalpui mek a nih dan CM chuan a sawi bawk a. An eizawnna chawisan a nih a, an sum lakluh a lo tam zawk nan trade 52 laiah incentive pek a nih dan te a sawi a ni.

Chief Minister chuan state pum hmasawnna atana hmasawnna ruhrel lian tak tak din ngaihpawimawh a nih thu leh, hemi ah hian inkalpawhna lama hmasawnna - rel kawng te national highway leh adangte chuan sumdawnna leh a kaihhnawih dangah hmasawnna a thlen tel zel tur thu a sawi a. Hmasawnna ruhrel daihrei tur dinna atana sawrkar laipuiin SASCI (Special Assistance to States for Capital Investment) scheme a duang chu lawmawm a tih thu a sawi a. State te'n tangkai zawka kan hman leh theih nan he scheme hnauai part-I a kaihhruaima inziak thenkhat chu a aia khirhlo zawka siamthat ni se tiin rawtna a thlen a. Hemi bakah hian sawrkar laipui scheme thenkhat hnuaiah land acquisition atana a hranpa a sum dah a nih loh avanga harsatna awm thin chu sutkian ni se a tih thu a thlen.

Sawrkar hmalakna leh bultum ngawr ngawr chuan hmasawnna hna zawng zawng a thawh theih vekloh avangin private investment uar tura hmalak zel a nih dan sawiin Chief Minister chuan Mizoram chu Ministry of DoNER in North East Global Investors' Summit a kalpui mek ah pawh phur taka hma a lakpui thu a sawi.

State chhunga Healthcare infrastructure in duhthu la sam tawklo mahse Mizoram chuan naupang 100% ah Rotavirus hri danna a pekchhuah tawh thu leh, ram chhunga Infant Mortality Rate hniam ber a nih thu a sawi a. Lawngtlai Siaha, Serchhip leh Mamit District Hospital te chu tihchangtlum a thuamthat mamawh a nih dan te, Community Health Centre-te chu First Referral Unit ni tura tihchak a pawimawhna te a thlen a ni.

Hmeichhiate dinhmun chawikan kawnga Mizoramin hma nasa taka a sawn dan sawi bawkin Chief Minister chuan District tina Working Women Hostel sakna tur sum pek mamawhna te sawi bawkin, sumdawng hmeichhia te'n an hman tangkai tur nau enkawlna (creche) siam tul thu te a sawi bawk a.

Chief Minister chuan mahni sahimna zawnga Mizorama raltlan te dinhmun leh state sawrkar leh mipuiin an lo dawnsawn dan te a sawilang bawk a ni.

Attachment